مرحبا بكل الزائرين

مدونتى مدونة عامة الكتابة فيها لاتلتزم بأى قواعد ادبية فهى كتابة بسيطة من القلب الى القلب من دماغى وبقلمى الخشب ت-01225069316

اصدقاء المدونة

السبت، ديسمبر 22، 2007

غلطان اللى يلوم عليكى ويعاتبك






في ناس مش بتحب الخير للناس

فى ناس
بتحب نفسها لاتساعد ضعيف ولامحتاج

طالعة واكلة نازلة واكلة زى المنشار

وفية ناس محتاجة لقمة تشبعها

وهدمة على القد تلبسها

مش محتاجة غير اللى يكفيها واللى يشبعها
----------------------------

في ناس فى ايدها تساعد وتعمل خير

لكن من الطمع والجشع مش بتشوف الغير
-----------------------------

فى ناس تحب تغنى على ناس

تبيع اى حد وماتخد منها غير كلام

ترسم وتلون وتعيشك فى اوهام
----------------------------

فى ناس كبيرها تعمل زيطة وهيصة

وتمشى فى زفة ولمة

لكن تساعد وتمد ايدها وتساعد غيرها

مش فى قاموسها موجودة

ولامعروفة عشان تعملها
-------------------------

فى ناس قريبة قلوب طيبة

على قدها عايشة بس من ربنا قريبة

بتساعد على قد ما تقدر والنية خالصة كويسة
----------------------------
وكل حاجة فيكى يادنيا ليهاالف شكل والف لون

صراع دايم بين خيرك وشرك

غلطان اللى يلوم عليكى ويعاتبك

ناسك هيا عليها اللوم هيا اللى بتختار

فين طريقها وازى تعيش

ان كان فى جنة
او فى نار
-------------------------------



تابع الجديد فى مدونة الثقافة والادب ومدونة الرعب وبلدى مصر

الأحد، ديسمبر 16، 2007

الخطافة انتشرت وبتخطف اى حاجة




خلى باالك وانت ماشى فى الشارع

خلى بالك من نفسك ومن كل حاجة

لو معاك موبيل او شنطة او ساعة

الخطافة انتشرت وبتخطف اى حاجة

على موتوسيكل راكب ومسرع وفى ثانية يخطف

ويجرى على اعلى سرعة ومعاة كل حاجة
--------------------------

مفيش امان دلوقت واتوقع كل حاجة

خلى عندك استعداد واحمى نفسك بنفسك

من حرامى وخطاف الشنطة والساعة
---------------------------

واقف وفى موقف ولا فى شارع

تبت على الشنطة وفى الزحمة ما تطلع الموبيل

وفى ايدك تمسكة لااحسن كدة بأيدك هضيعة
------------------------

لو طالع من بنك ومعاك فلوس اعمل حسابك

تخد بالك كويس وتبص قدامك

واركب على طول وياريت لو معاك عربية

او واحد صاحبك اهو زى الحارس على فلوسك
وخد بالك من نفسك

وخد بالك من الخطافة والهباشة

صعبة اسية ايامك
---------------------------

الأربعاء، ديسمبر 12، 2007

توت توت قطر ماشى من غير صوت





توت توت قطر ماشى من غير صوت

قطر جى من بعيد اشوفة جى افرح

واكون مبسوط
---------------------------

واسال واقول لية ماشى من غير صوت

تعبان ولا عيان مخنوق ولاقرفان

عشان علية كتيرضغوط
-------------------------------------

يبص ليا ابص لية

اضحك لية ضحكة يردها بعنية

علاقتى بية من زمان كان جدى بيخدنى لية

لاتقولى اتوبيس ولا عربية

بالثانية والدقيقة توصل فى الميعاد مظبوط
----------------------------------------------------

دلوقتى القطر بيشكى لية

لية محدش بيسأل فية

شباك مفتوح وباب مكسور

وعجل حوالين نفسة بيلف ويدور

وناس مكان الشنط قاعدة ونايمة

منظر مش حضارى قدام سواح بلدى الغالية

ياريت نصالح القطر على نفسة

ونعيد لية فرحتة وسعادتة

بس مش على حساب الناس والغلابة اللى بتحبة
------------------------------------------------

السبت، ديسمبر 08، 2007

معقول دة زمن معقول دة انسان




فين الحب فين الطيبة فين الحنية فين الامان

فين الود فين الرحمة فين الكلمة الواحدة

فين راحت فيك يازمان
----------------------

فين العدل فين الانصاف فين الحق فين الاحسان

فين الصبر فين الحلم فين الامل فين الانسان

فين غايبة المبادىء والاخلاق

فين راحت فين ياانسان
--------------------------

فين راحت الروح الحلوة فين حاضر وايوة

بين الكبير والصغير مش موجودة

فين الادب والاحترام فين راح الاهتمام

بين البشر وبعضها فى كل مكان
------------------------------

فين راحت اسف وغصب عنى ومش مقصودة

لية عند الغلط غاب الاعتذار والندم على اللى منى صار

لية التكبر والتمسك بالغلط ونرضى اكل الزلط

بدل من كلمة اعتذار وندم على غلط وقعنا فية

وحق علينا لاانسان
---------------------------

لية كلمة حق صعبة علينا وتقيلة على اللسان

لية نرضى نظلم ونكذب ونلون فى الكلام

ونهرب من الحقيقية كل يوم وليلة

ونفضل المصلحة ولو على حساب

كلمة حق وانصاف انسان
------------------------------

لية الكبير لما يسرق ويخد حاجة مش من حقة

نسكت وندارى ولانتكلم ونشكر فى اخلاقة وكرمة

ولما الصغير يسرق تقوم الدنيا والناس علية

والكل يطالب براقبتة وحسابة على سرقتة وغلطة

مع ان الكبير حرامى واستاذ والصغير حرامى وتلميذ

لكن بقينا نتصرف زى الخرفان والماعيز
--------------------------------

لية الصورة مش واضحة ومقلوبة

وكل حاجة ماشية بخالف تعرف

وكل حاجة بقت مش تمام ومعكوسة

وعشان تعرف تمشى لازم خيار لازم كوسة

معقول دة زمن معقول دة انسان
-------------------------------

الاثنين، ديسمبر 03، 2007

صور مراتة ... والفضيحة... عاشت قدامة



الحكاية بدأت بلعبة
وكم صورة وفيلم للذكرى
مراتة وبراحتة يعقد معاها
وقت ما يحب ويميل القلب
مين يلومة او يحاسبة
-----------------------------
لكن توصل انة يصور ويعمل فيلم
جامع بينة وبينها بيمارس لحظة حب
لخظة خاصة بيهم بس
ولاحد يشوفها ولابيها يحس
لكن صورها وعمل فيلم
------------------------------
وفى يوم عطل الكمبيوتر محتاج تصليح
خدة لآأشطر واحد يصلحة ويظبط فية
ونسى انة علية فيلم لحظة حب
بطولتة مع حبيبة القلب
-------------------------------
وفجأة انتشر الفيلم فى كل مكان
من محمول الى محمول سافر وراح كل مكان
شافة البعيد قبل القريب
ولما البطل شافة وعرف بااللى حصل قال غريب
-----------------------------
راح وجرى على اللى صلح عندة
قال لية وانا مالى باللى بتقول عنة
معرفشى حاجة خالص انكر كل اللى عملة
------------------------------
صبحت فضيحة على كل لسان
وبقى كل ماهو ماشى يحط وشة فى الارض
بعد ما كان عايش بالطول والعرض
ومراتة فضحتها اكبر كمان
نظرة الناس ليها نظرة غول وتعبان
-----------------------------
ودى كانت غلطة راجل ومراتة
رغم وجودها على طول قدامة
كان لازمتة اية التصوير وخلافة
والنتيجة فيلم انتشر ليهم
وفضيحة عايشة قدامة
----------------------------

السبت، ديسمبر 01، 2007

مدام فية ... حب وفية اخلاص



بينة وبينها حب كبير
يشهد علية كل صغير كل كبير
حب عاش جواهم سنين
حب بجد ما يتنسيش
لو راح منهم محدش فيهم
يقدر يعيش
-----------------------------
المشكلة فى فرق كبير
بيتة وبينها تلات سنين
يعنى هيا اكبر منة وهو اصغر منها
وفى مجتمع زى مجتمعنا
عيب ما يصحش
والرجل لو خدها كبيرة عنة
الحياة ما بينهم ما تنفعش
-------------------------
حالة وفى زيها كتير
لكن اسأل اى حد اسأل اى كبير
هتلقئى نفس الرد نفس الكلام
الكل حافظ ومزاكر فية
ومهما تقول انسى مفيش
من كلامك اى امل اى تغير
-----------------------------
مدام فية حب وفية اخلاص
لية نضيع لية اجمل احساس
اية يعنى كبيرة عنة تفرق اية
لية نيجى عليهم وندمر فيهم
ونفرق بينهم ونبعد بينهم ياناس
-------------------------------

الاثنين، نوفمبر 26، 2007

النهاردة بقى عندى تلاتين سنة والمدونة سنتين



النهاردة بقى عندى تلاتين سنة
النهاردة عيد ميلادى وعيد ميلاد المدونة
مدونتى عندها سنتين
----------------------------------------
ياة على الايام بتفوت بسرعة الواحد اصبح لايحس بوقت ولازمن تحس ان الايام كلها بتجرى بتحاول تسبق بعضها انا لسة فاكر انى كان عندى 20 ياة عشرة سنين تفوت هوى جرى وتكبرنى الايام بالطريقة دى من غير ما احس بيهم عدت الايام والشهور والسنين وكانها ثوانى والجى ياعالم ربنا يعلم فاضل منة كم وان كان مهما كان بكرة يجرى من غير ما احس ولا اشعر بية
----------------------------------------
النهاردة عيد ميلادى مش عارف المفروض اعمل اية ازعل ولا افرح مش عارف هيا سنة وعدت من عمرى زى سنين كتير عدت وفاتت المهم انها عدت وانا كبرت وبقيت 30 سنة
مش هتكلم عن نفسى هتكلم عن المدونة اللى بقى عندها سنتين وهحكى ليكم فى سطور بدايتى ازى كانت مع التدوين
--------------------------------------
بدايتى ومعرفتى بالتدوين كان عن طريق مجلة لغة العصر اللى فى عدد ليها كانت نشرة موضوع عن كيفية انشاء مدونة واجمل حاجة كان فية شرح خطوة خطوة لتعليم ازى انشاء مدونةدى كانت البداية ابتديت اخش على المدونات واتابع من بعيد لبعيد لحد ما عجبتنى الفكرة وعجبنى الموضوع توكلت على الله وعملت مدونة
--------------------------------------
كانت البداية صعبة ما كنت عارف اكتب فى اية بعد اطلاعى على اغلبية المدونات وجدت فيها سياسة وفيها شعر وقصص واخبار وفية مدونات تحكى عن نفسها فكرت وقولت اعمل مدونة عامة اكتب فيها مقالات وقصص قصيرة وشعر بالعامية وقررت انى اكتب فيها كل حاجة وعن اى حاجة المهم انى اكون مقتنع بالموضوع اللى بكتبة بعيد عن ارتباطى بقواعد معينة لكتابة شعر او قصة
ومنها اخترت الاسم الاول كان افكار وبعدها غيرتها فى مدونة تانية الى افكار حرة
---------------------------------------
الكتابة ابتديت وكان فية صعوبات بتقابلنى زى ما كنتش عارف ازى احط لينكات المدونات اللى بحب اخش عليها عندى وازى احط صورة او اعمل شات كل الحاجات دى كنت بشوفها فى مدونات تانية وكان نفسى اعمل زيها اتعرفت على محمد صاحب مدونة سويدى هو اللى ساعدنى وتعب معايا كنت بكلمة بالمايك وهو عمال يشرح ليا وانا اخطىء وارجعلة بصراحة ساعدنى كتير وكان لية الفضل فى انى اعرف حاجات كتير عن عالم التدوين من هنا انا بشكر محمد صاحب مدونة سويدى جدا
اصعب حاجة عليا بتزعلنى من ساعة ما عملت مدونة ترك الكثير من المدونين للتدوين وبعدهم عنة اما بقفل المدونة او تركها بدون عمل ياما ناس كتير خلال السنتين دول كنت اعرفهم وفجاة بطلوا تدوين قد اية بزعل لانى بفارق ناس اتوعدت عليهم وعلى كلامهم وجودهم فى المدونة ومهما كانت الظروف اللى تخلى الواحد يبتعد ممكن يخد فترة راحة ويرجع انا كتير عملت كدة لكن عمرى ما قررت ابعد عن التدوين
لانة خلاص اصبح فى دمى
--------------------------------------
اخيرا عايز اقول انى من حبى وفضولى لمعرفة كل شىء عن الرعب عملت مدونة افكار مرعبة انا بنقل كل موضوع غريب ومرعب يقع تحت ايدى وبحطة عندى مواضيع الرعب ممكن يكون فيها متعة واثار ومعرفة وخوف وبحلقة عيون انا بحب اتابع كل حاجة عن الرعب واللى يعجبنى بجيبة فى المدونة
فى مدونة افكار والثقافة والادب وهنا من حبى للعلم والمعرفة الادبية قررت اعمل المدونة وانقل فيها سير زاتية لكبار الكتاب او مواضيع مهمة عن عالم القافة والادب
مدونة مصر بلدى باللغة الانجليزية بنقل فيها كل حاجة عن بلدى مصر الحبيبة من معالم سياحية او متاحف او اماكن او مقالات تبرز الجمال اللى فى بلدى وكتبتها بالانجليزى عشان توصل لاااغلبية اانحاء العالم
وبكرة ياترى هتجى فكرة لاانشاء مدونة فى انتظار الفكرة تستوى وبعدها هقول ليكم عليها
------------------------------------------
دى مدونة الاخ العزيز محمد

الثلاثاء، نوفمبر 20، 2007

تفاح وفاكهة وكلة على الريحة



رجل على رجل قاعدة معلمين
دلوقتى قاعدة بنت
والشيشة ودخانها فى ايدها منورين
تشد شد وتسحب سحب
وكلة على الصدر وعلى القلب
------------------------
تشرب وتشد مش اى شيشة
تفاح وفاكهة وكلة على الريحة
بقت موضة ومنتشرة بين البنات
الشيشة وتفاحها
وعلى القهوة الكلام خد وهات
------------------------
خلاص بقت بالشيشة بنت مودرن وعصرية
ومفيش فرق بينها وبين اجدعها شنب فى المطرية
كل يوم قبل الجامعة على القهوة تشوفها قاعدة
هيا وكم بنت والشيشة دايرة ما بينهم طول القاعدة
---------------------------
وياسلام عليها وعلى ماشيتها
بعد حجر واثنين متظبتين وعلى كيفها
تمشى وتتمختر ما تقولشى عروسة بتزف
تدخل جامعتها حوالين نفسها تدور وتلف
-----------------------------
الشيشة تضر سواء شاب اوبنت
لكن مع البنت تفرق والخسارة اكبر
خسارة صحة وسمعة وفضيحة وسط الجامعة
ونار هتفضل قايدة فيها منين ماتروح ولعة
-----------------------------
واخر الكلام البنت على القهوة
تجيب ليها مصيبة وبلوة
ولاحد هيفكر منها يقرب
وان قرب هيخد منها ويجرى ويهرب
---------------------------

السبت، نوفمبر 17، 2007

صحى الضمير ترجع انسان

لو حسيت انك تعبان مجروح وزعلان

كل خظوة تخطيها نار
لاعارف ليل من نهار
والايام كلها فى عنيك
واحدة وزى بعضها
حلوها زى مرها
يبقى انت فى طريق غير طريقك
ومكان غير مكانك
----------------------------
لو حسيت انك وحدانى
ومن يوم للتانى
بتقول اة يانى
يااسوة ايامى وظلم زمانى
يبقى اكيد محروم من الحب
والنص التانى
--------------------------
لو حسيت انك مش انسان
وفى عيونك دمعة احزان
صحى الضمير من نومة
صحى الضمير ترجع انسان
---------------------------
لو حسيت بغدر اقرب الناس ليك
حاول تقرب وتعرف لية
كان الغدرلية
كان الغدر بيك
بمكن فية حاجة حصلت وبدون قصد
خلت اقرب ناسك تقلب عليك
------------------------------
لو حسيت انك عطشان
مهما تشرب وتشرب لسة عطشان
افتكر على طول الرضا
وقول الحمد الله
نقطة مية تكفيك ياانسان
--------------------------------

الأربعاء، نوفمبر 14، 2007

تحت العجل ضحية جاهزة

عربية ماشية والسرعة عدت كل حدود
صاحبها لاهمة قانون ولا اشارة مرور
ولاهمة مين ينداس تحت العجل يكون موجود
----------------------------------
ماشى من غير رخصة ولا اثبات شخصية
قاصر ومش من حقة يركب عربية

لكن مدلع وبابا جاب لية عربية
مفيش احترام لطريق ولا انسان
مش فى دماغة غير راحتة المزاجية
-------------------------------
ويوم مع يوم تحصل كارثة
تحت العجل ضحية جاهزة
ضحية طيش شاب مدلع
لاضمير ولااحساس عندة
والحق علية وعلى بابا بتاعة من قبلة
------------------------------
وبعد الكارثة نكتشف فى لحظة
ان الشاب ما كان من حقة يركب عربية
لارخصة معاة ولابيعرف يسوق
وانا ساق يدوبك يكون
على حجر ابوة ولا امة
-----------------------------
فيها اية لو كان فية التزام
وما ركب عربية قبل الميعاد
ولا كان اتسبب فى كارثة وموت انسان
هنتعلم ولا خلاص مفيش احساس ولا اهتمام
---------------------------------

السبت، نوفمبر 10، 2007

كم مرة حسيت ان الزمن دة مش زمنك


كم مرة تبنى وتعلى وغيرك يجى ويهد
كم مرة تكتب وتعبر وغيرك يجى ويهد
كم مرة اديت وضحيت وفيت واخلصت لناس تيجى فى الاخر وتهد
---------------------
كم مرة تمشى فى طريق وتحتاج ايد صديق تشدك
وتيجى وتساعدك ما تلقئى غير الرفض والصد
كم مرة شوفت فى عيون اقرب واعز الناس ليك
نظرات حقد وحسد غيرة ونار تحرق وتدمر واثرها
فينا معلم ومالو حد
----------------------------
كم مرة يحلف حبيك انة عمرة ما هيسيبك
وهيفضل ليك باقى ومستنى رجوعك لية
وفى ثانية تكتشف الوهم الكبير وخيانة الحبيب
وضياع الحب على عتبة المصالح اتهد
--------------------------------
كم مرة مع الايام تكتشف انك مش انسان
ومش عايش الا فى غابة
القوى يأكل الضعيف والكبير يقضى على الصغير
فين الانسان فين الضمير
ما تسمع غير كلام عنة وكم وعد
-------------------------
كم مرة حسيت ان الزمن دة مش زمنك
انك غلطة وجيت فى وقت غير وقتك
غلطة وبتدفع ثمنها من عمرك ومن دمك
والدفع مستمر مالو نهاية ومالو حد
----------------------------
كم مرة ومرة ومرات كتير تحس انك مجرد اسير
لظروف وحاجات كتير بين ايدك مش معروفة
ولاواضحةولامفهومة
وتشوفها ما تعرفشى ان كانت اصل ولا صورة
ولا اية تكون بالظبط
-----------------------------------

الاثنين، نوفمبر 05، 2007

محتاجين ---- بجد --- قانون


حافظ على البيئة بالفعل مش بالكلام
على البيئة حافظ خلى بيها فية اهتمام
صحتى وصحتك صحة كل الناس
فى بيئة نظيفة جميلة صدقنى مش احلام
---------------------------------
خلى البداية عندك خليها عليك
لما يشوفك غيرك مهتم ومحافظ وبتعمل اللى عليك
هيقلدك وهيعمل زيك
خلى البداية عندك خليها عليك
---------------------------------
تعالة نزرع قدام كل بيت ومكان شجرة جميلة
نروبها ونهتم بيها
وبكرة تضلل علينا
من شمس الصيف تحمينا
------------------------------
ازرع ولاتقطع شجرة
ازرع فايدتها فى بكرة
تعالة وبصوت مسموع نصرخ ونقول ممنوع
تقطع شجرة تهدم بستان
مش من حقك ياانسان
-----------------------------
اصرخ سمع كل الكون محتاجين بجد قانون
يحمى الارض يحمى نباتها
يحمى البيئة يحمى الكون