مرحبا بكل الزائرين

مدونتى مدونة عامة الكتابة فيها لاتلتزم بأى قواعد ادبية فهى كتابة بسيطة من القلب الى القلب من دماغى وبقلمى الخشب ت-01225069316

اصدقاء المدونة

السبت، أبريل 25، 2009

يكفيك ياا انسان سؤ الظن باخيك الانسان


رجل راح عند دكتور عشان يعمل جلسة علاج طبيعى متعود ديما يروح لية فى الاسبوع 3 مرات وفى مرة راح لية اول ما دخل من باب العيادة ما وجدش حد لاناس جاية تعمل جلسة ولا موظفة الاستقبال قاعدة فى مكانها جلس فى غرفة الاستقبال ومرت علية ساعة وهو جالس كدة وحيد محدش دخل علية ابتدى شعور القلق والخوف يجى لية



ابتدى يكح بصوت عالى يكون الدكتور مشغول مع مريض والموظفة مش جت النهاردة وبعد الكحة وبصوت عالى وجد الدكتور طلع لية وقال لية اتفضل دخل الرجل الغرفة اللى فيها جلسة العلاج الطبيعى والدكتور قال لية ثوانى وراجع ليك وهو جوة الغرفة سمع الدكتور صوتة بقى عالى وبيشد الموظفة ويقول ليها كنتى فين ياهانم



والموظفة عمال تبكى وبصوت عالى وبعدها دخل الدكتور دخل على الرجل عشان يعمل لية جلسة العلاج الطبيعى وبعد ما خلص خرج الرجل يحاسب الموظفة واللى كانت قاعدة عادى ومش باين عليها خالص انها من شويا كانت بتبكى وحاسب ومشى الرجل الا كانت دماغة عمالة تودى وتجيب ويقول معقول يكون الدكتور كان مع الموظفة فى الغرفة لوحديهم يعنى يكون لا استغفر الله مش ممكن



اى حد فى الموقف دة دماغة هتروح وتيجى والظن هيودية فى كل جانب وكل حاجة جايزة ووقتها هيكون التفكير الى جانب الفكرة والظن الشرير اكتر . وطبعا فى حياتنا الظن موجود خير او شر فى بعض الناس اللى بنتعامل وياهم وخصوصا لما يحصل موقف زى دة بيلخبط دماغ الواحد ويخليها مش مظبوطة يا ترى ياهل ترى وتبقى سمعة الدكتور اية لو الرجل حكى اللى حصل ومهما مرت الايام الظن موجود فى حياتنا المهم نعرف ان بعض الظن اثم



يكفيك ياا انسان سؤ الظن باخيك الانسان ان بعض الظن اثم هكذا ذكر القران وتعلم معنى الحب والوفاء فهو سلاحك ضد الالم والاحزان ولاتكن متسرعا تسير وراء الاوهام وابتعد عن ظن السؤ وتمسك بالايمان


الثلاثاء، أبريل 21، 2009

الحزن والمطر فى مصلحة كل شعب




ياسلام على الشتاء بحبة اوى ولما يغيب بحس انى وحيد من غير صاحب ولاونيس وخصوصا المطر بيوحشنى اوى من حبى للمطر بقول ياريت الدنيا تمطر فى جميع فصول السنة عشان مش اتحرم ابدا من المطر لان صعب على اى انسان البعد عن من يحب فالانسان المحب يفضل الموت على ترك من يحب ان يذهب بعيد عنة


ولا الحزن بحب ديما اكون حزين وعندى اكتئاب ومخنوق ومش طايق نفسى بحس ديما وانا حزين انى وصلت لمرحلة النضج وديما وانا حزين افهم اى حاجة وهيا طايرة ويبقى يوم مش فايت لو حسيت فى يوم انى سعيد وفرحان بيكون يوم منيل ومش لية نهار وبحس فية انى عبيط ومش فاهم اى حاجة


المطر والحزن عندى مرتبطين بيا من زمان وبحبهم حتى غنيت ليهم زى ما ليلى مراد غنت للميا والهوى انا غنيت فى حفلة عالم الحزن والمطر وقولت بحب الحزن والمطر دول على قلبى ياناس قدر لو راحو من حياتى تروح ياعينى حياتى واحس انى فى سفر وخدت على الاغنية المركز الاول اللى ديما بحصل علية لما اكون طالع من تحت المطر او حزين



واخير وجدت من يرجح اقوالى ومش اى حد دول علماء ومن استراليا اللى جنب بلاد الكوكو كو قال اية العلماء دى بتقول
أن أداء الناس بيكون قوى وناضج وسريع لما تكون الناس حزينة او عندها اكتئاب او بتمشى تحت المطر لكن الناس السعيدة بتكون غير ناضجة ولاتفهم اى شىء مثل الحزين بتاع المطر


ونبى ياجماعة اية رايكم نمشى تحت المطر ونعيش حياتنا على طول فى الحزن والاكتئاب عشان نكون ديما ناصحين وفاهمين وانا اتارى الحكومة مش همها الشعب حزين ويشكى من الاسعار اتارى انها قرت البحث ومقتنعة بية يعنى بتعمل لمصلحة الشعب
واحنا اللى فهمنا غلط
-
ملحوظة
الان تعمل المسابقة على مدونتى وفى جوايز
اللى يحب يشارك يدخل
تحياتى للجميع

الأحد، أبريل 19، 2009

الفجل ألآبيض وعيش حياتك الطبعية




ناس كتير بتعانى ديما لان جسمها مليان واكتر حاجة تتضايق لما يكون شاب او بنت فى سن صغير وجسمة مليان . يروح يشترى لبس على الموضة او ملابس معينة تعجبة وهيموت عليها ويجبها ويدخل ويقيس اكتر من مقاس لكن مفيش حاجة مناسبة لية نفسيتة تتعب ويخرج من محل الملابس او يجبر على انة يجيب لبس مناسب لية بس مش على المزاج


دى مشكلة من مشاكل كتير بتقابل بعض الناس اللى جسمها مليان ويبتدى يفكر الواحد فى الرجيم وديما يفشل لانة مش قادر يأقلم نفسة على نظامة الجديد فى تناول الطعام وفى اللى يقدر يظبط نفسة على الرجيم ويخص ولكن بعد كدة ترجع ريمة لعادتها القديمة ويفاجأ بزيادة وزنة مرة اخرى بل واكبر مما كان علية قبل عمل الرجيم وفى ناس بتفكر فى تدبيس المعدة مع انى مش انصح بكدة لان فى ناس عملتها وصحيح خصت بس حاجات تانية تعبتها بعد تدبيس المعدة


قريت فى مرة ان الاسباب الرئيسية لزيادة جسم الانسان بتكون عن طريق عوامل وراثية اكتسبها الانسان بالوراثة عن طريق احدى اقرب المقربين من العائلة ودة رغم ان مش متخصص فية بس مع دة لان فى ناس بتاكل اكل ياكل جمل ومش بيبان عليها اى زيادة فى الوزن وناس تاكل حاجة بسيطة وجسمها يزيد ودة يأكد انها وراثة بالدرجة الاولى وحكاية هرمونات نشطة بجسم الانسان


من راى مفيش احلى وافضل من الحاجة الطبعية الفجل الأبيض يأتى فى مقدمة الأغذية التى يوصى بها فى برامج إنقاص الوزن الزائد ، فقد ثبت أن الفجل الأبيض يساعد على إذابة الدهون الزائدة والتخلص منها، وبالتالى المساعدة فى إنقاص الوزن الزائد وخصوصا منطقة البطن والاردف. يعنى حاجة طبعية وتجربتها مش هتضرر ابدا لو فشلت حتى


يعنى الواحد يجيب يجى بتاع كدة خمسة كيلو ويظبط نفسة عليهم وعلى كم يوم كدة ويشوف النتيجة اية ولو فشلت عادى مش هتخسر حاجة الفجل عموما غنى بفتامين سى وبيفيد الكلى جداا يعنى كدة كدة انت كسبان ودة لانى مؤمن ديما ان الطبيعى ديما كسبان وكمان بعد محاولة الواحد اكتر من مرة ياريت بلاش يأس وارضى بحالك ونصيبك وعيش حياتك الطبعية زى اى حد

الجمعة، أبريل 17، 2009

الزمن والايام* الحدث والتاريخ




هو الزمن صعب ومش برىء ولا الانسان الا غامض ومش صريح.؟ مين اللى بيرسم ويكتب التاريخ والاحداث الزمن ولا الانسان؟ كل واحد فينا عارف الاجابة بس فى بعض الناس بتحب تعمل مش وخدة بالها وتلوم على الزمن والايام مع ان احنا اللى بنكون الزمن والايام احنا باللى بنعملة وبالطريق اللى ماشين فية بتكون حياتنا بنكتب وبنرسم وبلون بأيدنا حياتنا وكل ما فيها من احداث وبنختار الطريق اللى نحب نكون فية ومنة تيجى الاحداث ويكون التاريخ لو حلو او وحش فهو من اختراع الانسان وليس الزمن والايام


مفيش انسان ولحظة ولادتة الا وبيكون صفحة بيضة وكل حرف او كلمة بتكتب فى الصفحة بتكون عن طريق صاحب الصفحة نفسة يعنى احنا اللى بنختار واحنا اللى بنخلى الصفحة حسب ما احنا عايزين ممكن تفضل بيضة وممكن سودة وممكن ابيض على اسود يعنى لا الايام ولا الزمن ولاانسان غيرك ممكن يكتب حاجة فى صفحتك انت اللى بتكتب كل اللى انت عايز تكتبة وشايف انة مناسب ليك فى حياتك


ومن هنا لو جمعنا كل صفحة خاصة كتبها الانسان عن نفسة يتطلع لينا من كل الصفحات دى الزمن والايام لكن محدش بيكتب فى صفحة حد كل واحد مسئؤل عن صفحتة ومحدش بيعمل حاجة الا لو هو عايز يعملها ما هو مش كل الناس ليها عقل واحد دة لكل انسان عقل واحد خاص بية قد تختلف العقول والقلوب والشخصيات والصفحات ولكن يكون الاتفاق على ان الجميع انسان يفكر ثم يعمل ما يريد ومن هنا يكون الحدث ومن هنا يكون التاريخ


وبما ان كل انسان ولية عقل وشخصية مستقلة يكون قادر على الحياة وبما فيها يعلم كيف يتعامل مع الاخرين ولو انجرح الانسان بأى شكل من الاشكال اكيد بيكون فى اسباب لو قدرنا نعرفها كويس ونضع تحتها المئات من الخطوط اكيد راح نتجنب الوقوع فيها مرة اخرى ومن يقع ولم يتعلم فهو المسئؤل عن ما حدث لية وليس الاخرين فتأثير الاخرين فينا ممكن ان يكون ولكن لايكون الا بمساعدة وتسليم منا الى ما يريد الاخرين ان نكون فية

الجمعة، أبريل 10، 2009

مش عيب ان الانسان يغلط




تخيل نفسك تعمل فى شركة فى قطاع العلاقات العامة او امن الشركة يعنى استقبال الزائرين وفى مرة دخل عليك زائر وقال ليك عايز مدير الشركة قول لية فلان واتصلت بالسكرتارية اللى بلغت المدير والمدير قال ليها خلى الامن يقول انى مش موجود هتعمل اية؟ هتكدب وتقول للزائر ان المدير مش موجود مع انة موجود والا هتقول لية انة هنا بس مش عايز يقابلك وممكن كدة تخسر عملك لانك مش نفذت تعليمات المدير رغم انها تعليمات خاطئة شكلاا ومضمونا
ولو نفذتها هتخالف اللى اتربيت علية واللى ربنا عز وجل ورسولنا الكريم امرنا بالبعد عنة

وكلنا عارفين وبنعلم ولادنا من وهم صغيرين الكداب هيروح النار يبقى ازى اعلم علم واخالفة انا فى حياتى ياترى ممكن الانسان يعمل كل حاجة غلط ويضعها على شماعة الظروف ومش بأيدى واعمل اية يعنى كدة اقلب الحقائق واخلى الصح غلط والعكس مجرد ان الظروف الصعبة اجبرتنى على فعل الاخطاء والا الانسان عاقل وربنا سمح لية بالاختيار وعلى اساس الاختيار يكون حساب كل انسان يوم القيامة



انا فاكر قريت موضوع عن عقاب النمل لنملة اخرى لانها كدبت عليهم رغم انها كانت بريئة ولكن الحقئائق والظاهر امام مجتمع النمل وقت الحدث كان كذب النملة حيث كانت النملة تقول لمجموعة من النمل انة هنا يوجد طعام وعندما ياتى النمل لايجد وحصل كدة اكتر من مرة لحد ما قام النمل بقتلها عشان كدبت عليهم واللى حصل كان واحد يحط الطعام قدام النملة ولما تمشى تجيب اصحابها النمل يشيلها فطلعت كدابة امام الجميع




هو مش عيب ان الانسان يغلط العيب انة مش يعترف بغلطة ويستمر علية ويضع الحجة وراء الاخرى ليظهر بمنظر الضحية والضعيف الذى اجبر على فعل الاخطاء . الغلط والاخطاء واردة فى حياة كل انسان المهم ان الواحد يتعلم منها وفى حياتة بعد كدة يبعد عنها على قدر المستطاع ويستغفر ربنا ويتوب عن اللى عملة فى ما سبق من حياتة لكن تبرير الاخطاء فهى نوع من الخداع والكذب على النفس والاخرين

الأربعاء، أبريل 08، 2009

قول ما تقول تيجى نقول كلنا




التاج هذا اهداء من الصديقة سارة صاحبة مدونة سارة واشكرها على الاهداء
------
أسمك؟
تامر

المشهور بيه وسط صاحبك؟
تيمر او تمورة

سنك؟
31

مجال دراستك؟
كمبيوتر والكترونات

أسم مدونتك؟
افكار حرة

صورتك الرمزية في المدونة بتعبر عن أيه؟
عن العيون لان الانسان مهما يخبى العيون تظهر اللى بية

هل فكرت في أغلاق المدونة؟ والسبب؟
انا بقالى والحمد الله 5 سنين بدون عمرى ما فكرت افقل المدونة

أيه رد فعلك لو حد قل أدبه عليك في تعليق؟
قلة ادب يعنى نقاش داخل الموضوع اسبها وارد علية باحترام واحاول اقنعة وجدتة زودها ما ارد علية تانى وممكن فى الظروف الصعبة امسح الرد

أسوء مدونة؟
مفيش بالتحديد مدونة معينة

هيحصل أيه للإيميل بعد ما تموت؟
هيفضل مقفول الى الابد

أديت الباسوورد لحد قبل كده؟
لا لم اعطية

السفر بالنسبة لك؟
السفر جميل بس مش احب طول السفر

المود بتاعك ايه؟
الحمد الله فى الغالب تمام

بتعمل أيه في وقت فراغك؟
على النت او فى القراية والخروج احيانا

الأكلة المفضلة؟
البسلة

الصفات التي أخذتها عن والدك؟
الطيبة
عصبية فى بعض الاحيان
الصبر
الارادة

الصفات التي أخذتها من والدتك؟
الحنان
المعاملة الحسنة
الطيبة
.الهدوء

اكثر ست حاجات بتحبهم؟
الحب بصدق
الاخلاص
الامانة
الاحترام
الصدق فى التعامل
راحة البال

اكتر ست حاجات بتكرههم؟؟
الكذب
النفاق
الغش والخداع
الحسد
خيانة الامانة
التكبر

شخصيتك نوعها أيه؟
هادية وبسيطة
لكن قوية

لماذا دخلت عالم التدوين من الأساس؟
لانى بحب الكتابة فيها تعبير عن النفس وعن الناس والدنيا مش شرط اكون محترف عشان اكتب يكفى التعبير عما اريد

أحلى جملة قيلت في وصف مدونتك؟
مفيش جملة بالتحديد

أهمية التعليقات بالنسبة لك؟
تعبير وتشجيع لما اكتب مهما كان

احلى بوست كتبته؟ وضع اللينك ثم أذكر السبب؟
لايوجد بوست محدد
افضل مدونة قرأتها؟
كل مدونة ادخلها فهى مدونة رائعة
أفضل بوست قرأته؟
مافى شىء محدد

الشغل بالنسبة لك؟
مصدر رزق روح وحياة


الأنترنت بالنسبة لك؟
عالم كامل فى الحلو والوحش والانسان هو اللى بيختار اى طريق عايز يدخلة

تمرر التاج ده لمين؟
احبابى كتير ربنا يبارك فيهم كلهم
مش هحدد حد
اللى يريد يجاوب التاج يخدة
-------------------
تحياتى للجميع

الأحد، أبريل 05، 2009

النجم مش عجبة ينتج لنفسة


الكل عارف ان الازمة المالية والاقتصادية مبهدلة العالم كلة ومأثرة على اكبر الدول ما بالك تأثيرها على الدول النامية اللى احنا منها ومش عارف هنفضل نامية لحد امتة الله اعلم. ما علينا االمهم ان تأثيرها باين للكل ويحس بيها اصحاب الدخول المحدودة ان وجدت والمعدومة طبعا ام اصحاب الدخول العالية والعالية اوى واللى يادوبك اللى زينا يحلم بيها ان عرف يحلم اساسا بيها فى ناس فيهم راكبين دماغهم.


وهم من اصحاب الدخول العالية رغم معرفتهم بالازمة وتأثيرها على جميع المجالات الا انهم لايشعرون بها ويطلبون دائما زيادة اجورهم وبالاخص نجوم الشباك من المثلين والممثلات. قريت خبر بيقول ان محمد سعد مصمم وراكب دماغة ان يكون اجرة عن الفيلم القادم 13 مليون جنية وفشل المنتج وائل عبدالله فى محاولة اقناع محمد سعد فى تخفيض الاجر الى 5 مليون جنية بس عشان الازمة المدمرة التى تمر بها جميع المجالات بما فيها قطاع السينما ولكن صبح صبح ياعم الحج لم يقبل ابدا ان يتنازل عن الاجر بتاع 13 مليون ويخد 5 مليون رغم فشل اخر افلامة وعدم تحقيق مبيعات فيها ونبى دة نطلق علية اية غير طمع بلا حدود


طيب حد يدينى ربع 5 مليون دول ولا ربع ربعهم وانا لو رفضت قولو عليا مجنون بقى بس محمد سعد وكتير زية ماشين بقانون البحر يحب الزيادة ولايوجد عندهم اى نظر الى اى ظروف والله انا شايف ان المنتج او اى منتج فى ظل الازمة دى لايتنازل عن الاجر المنخض والحل الوسط ومش هيكون ظالم النجم كمان وان كان النجم مش عجبة ينتج لنفسة بقى
او يعقد فى البيت يريح ويستريح






نجبى بقى للنجم تامر حسنى اللى كل حفلة يغم على كم بنت وكم واحدة تصوت وتعيط وياعينى ديما تامر بيعيط وياها تشجيع بقى للجمهور الاول الحكاية دى دخلت على الناس لكن لما تتكررر كل حفلة لتامر يبقى الموضوع فى حاجة ززى ما ناس كتير بتقول ان تامر بيأجر البنات دول عشان يعملو كدة وانا برجح دة ومش بعيد علية وطبعا كلنا عارفين لية .


والنجم تامر حسنى كمان عامل مشاكل مع المنتج نصر محروس اللى اكتشفة وقدمة للجمهور وياريت تامر قدر دة بالعكس دة عايز يروح شركة تانية طبعا عشان فلوس اكتر واخر خبر كان بيقول انة كان فى كلام لااتفاق مع شركة روتانا للعمل بها لكن تامر حط شروط صعبة ومنها مطالبة تامر يكون اجرة زى اجر عمرو دياب طيب ازى يعنى هو انت ياتامر زى عمرو دياب ولافى نفس شعبيتة ولا ليك تاريخ فنى زى عمرو دياب لاطبعا يبقى لية كدة الطمع اقل ماجمع وطبعا الشروط رفضت وتم المحاولة لتقرب وجهات النظر لكن تامر رفض


يعنى حال النجوم دى يحير بس نقدر نقول ان فى نوعية من الناس لما الفلوس بتجرى فى ايدها حالها بيكون متلخبط ويعتقد كل واحد فيهم انة هو اللى فيهم والباقى سلطة وهم وعايشين فية ونبى ياجماعة اية رايكم حد يرضية كدة
توقيع الغلبان / شديد ابو حديد

الجمعة، أبريل 03، 2009

تجار البحر وتجار المال




رجعت اخيرا الى بلدى رجعت الى دنيتى رجعت الى ناسى واهلى رجعت بعد غربة وغياب 13 سنة ياة عمر تانى رجعت بكل شوق وحنين . يوم حضورى الاول اول ما نزلت من الطيارة بوست الارض اللى اتحرمت منها 13 سنة وحمدت ربنا على رجوعى ليها الانسان فينا مش بيعرف قيمة شىء الا بعد ما يغيب عنة ودة حسيت بية وانا فى غربتى كنت ديما بفكر فى بلدى وكل مافيها كانت واحشنى وشوقى ليها ما انتهى لحظة فى غربتى

عمرى ما حبيت السفر ولافكرت فية رغم ظروف الحياة الصعبة اللى كنت بمر بيها بعد تخرجى اصبحت مجرد شاب عاطل انضم الى قافلة العاطلين فى البلد حاولت ادور على شغل كتير لكن ديما كانت الابواب مغلقة حتى يوم ما وجدت اعلان فى جرنال ومطلوب التخصص بتاعى فرحت وجريت وحضرت ورقى ورحت اعمل مقابلة ونجحت فى الاختبار وكنت رقم واحد على المجموعة الموجودة يعنى خلاص هتعين وهحصل على الوظيفة لكن حصل غير كدة واتعين اقل واحد فى المجموعة ومشيت وانا حزين محطم خصوصا بعد ما ميل عليا سكرتير المكتب وقال ليا انت افضل واحسن واحد فى المجموعة بس فلان تعينة جاى من فوق مش تزعل وربنا يوفقك فى مكان تانى

حتى الانسانة اللى حبتها وحبتنى سبتنى مع اول عريس جاهز اتقدم ليها ومع ظروفى الصعبة واللى مريت بية فى يوم كنت بتابع جرنال وجدت خبر عن موت الكثير من شباب بلدى فى البحر وهم على مركب بيحاول الدخول بيهم الى ارض اجنبية ارض الاحلام الوردية اللى الكل بيحلم بيها رغم بشاعة ما قريت اول مرة افكر فى السفر ومن هنا ابتديت احاول وابحث عن طريق اسافر منة واروح الى ارض الاحلام الوردية عشان احقق اللى بحلم بية وماعرفتش اعملة فى بلدى

اول حاجة روحت سفارة بلد الاحلام الوردية للحصول على التأشيرة للدخول ليها بالطريقة الشرعية معتمد على خبرتى فى تخصصى كما اانى اتكلم اكثر من ثلاث لغات خلاف لغتى الاصلية ولكن جاءت المحاولة بالفشل ولم احصل على تأشيرة الدخول رجعت وانا محطم اكثر ما انا محطم وهنا فكرت فى السفر عن طريق الهروب مع تجار البحر برغم ما سمعت وقرات عن الحوادث التى تحدث ولكن كان لايوجد طريق اخر كان مطلوب مبلغ كبير بالنسبة لشاب مثلى لايملكة رغم خوف والدى عليا الا انة ساعدنى بجزىء واستلفت باقى المبلغ من احدى جيرانى

وركبت المركب وكان معى حوالى 20 شاب اخرين من بلدى من محافظات مختلفة وكان معنا 4 اخرين من تجار البحر واللى هما مسئولين عن توصيل المركب قرب شاطىء ارض الاحلام الوردية وكان كل منهم يحمل سلاح وتحرك المركب ودخلبنا الى اعماق البحر والى رحلة لااحد فينا يعلم كيف تنتهى بينا عدت اول ليليتن بخير وفى الثالثة قرب الوصول الى اقرب مسافة للشاطىء للنزول بالبحر سباحة الى الشاطىء حيث كانت المسافة حوالى 200 متر على عمق رهيب وجدت البحر من ليل اسود الى ضوء رهيب وكان النهار جاء فى غير وقتة وسمعت انزار من شرطة سواحل بلد مدينة الاحلام الوردية وهنا تجار البحر امرو الجميع بالنزول الى البحر والذهاب الى الشاطىء وحدث ما حدث وحصل ضرب نار بين الشرطة وتجار البحر ونحن فى البحر نحاول ونحارب مع الموج العالى وضرب النار وخوفا من القرش والاسماك المفترسة الاخرى

وصلت الى الشاطىء بعد ساعتين مما حيث وجدت معى اثنين اخرين من ركاب المركب ولااعلم اين ذهب الباقى هل تم القبض عليهم ام ماتو بالرصاص او الاسماك افترستهم كان لايوجد وقت للتفكير وجرينا نحن الثلاثة وخرجنا من الشاطىء الى المدينة وتفرقنا نحن الثلاثة بعد دخول المدينة ايضا وكل منا يحاول ان يجد طريقة للحصول على ما اتى من اجلة معرض حياتة للخطر ولكن ما كان فى اختيار اخر بعد ما راينا فى بلدنا من عدم وجود فرص عمل وان وجدن فهى براتب لايكفى اسبوع واحد اما الوظائف براتب عالى فهى من اجل اللى فوق واللى واصل لاغير
وبعد الرجوع الى بلدى اللى بحبها رغم اللى شوفتة فيها لان العيب مش فيها العيب فى الظروف والتى خلقتها بعض الناس التى لاتعرف غير حب المال والسلطة ولكن محاولة خلق فرص عمل متساوية للجميع هى من المحرمات والتى يجب البعد عنها بفكر اعمل مشروع كبير فى بلدى واعين شباب كتير احاول اخفف على قدر المستطاع من طابور العاطلين بس يارب ما يوفقنى الروتين ورجال تدمير المشاريع الناجحة ان لم تمشى على هواهم دمروها مين يرضية كدة
توقيع الغلبان / شديد ابوحديد

الأربعاء، أبريل 01، 2009

نسبنا الحكومة وبقينا قرايب




كنت قاعد بشم الهوى فى جنينة على النيل وقت غروب الشمس اصلى بحب اوى اشوف الشمس وهيا بتغرب كل يوم منظر طبيعى جميل وكل ما هو طبيعى تجد لة فى الحياة شكل ولون وطعم جميل لان الطبيعى ديما يكسب الصناعى مهما كان يحتوى على جمال ومواصفات فهى صناعية معرضة للكسر والاختفاء عكس الطبيعى فهو باقى الى اخر يوم فى الحياة وديما بقول خليك فى الطبيعى تكسب

كان جنبى بنت وست كبيرة خمنت من كلامهم انها امها البنت كانت مكشرة ودمعتها على خدها شدنى المنظر قربت اكتر منهم حبت اسمع واعرف اية الحكاية حب استطلاع مش اكتر رغم انها حاجة مش تخصنى لكن قولت بعد ما شوفت حالة البنت العلم بالشىء ولا الجهل بية ويمكن اقدر اساعد. وجدت الست الكبيرة بتقول للبنت يابت ياعبيطة هيا دى فرصة حد يضيعها من ايدة دة رجل ومستريح يعنى مال وسلطة وهيكون ليكى وضع تانى فى الحياة لما تتجوزية والبنت تقول ليها مش حاسة بقبول ناحيتة ترجع تقول ليها الست الكبيرة

حب اية وبتاع اية يابنت الحب دة كلمة لاهتشرب ولاهتتاكل ولاهتعيشك فى ربع المستوى اللى هتكونى علية لما تخدى الرجل الجامد دة ومش تنسى انة شغال فى مكان يتبع الحكومة يعنى مفيش احلى ولااحسن ولاافضل من كدة ودى فرصة لو ضيعتيها هتندمى عليها بعدين وتقول ياريتنى سمعت كلام امى هنا عرفت ان الست الكبيرة تبقى امها وبتحاول تخد موافقتها على الرجل الجامد اللى شغال فى مكان حكومى يعنى اخد موافقة بالضغط والحنية واللعب بالكلمات وحجة الزمن ومعاك قرش تسوى قرش وان الموضوع لو تم هنكون نسبنا الحكومة

افتكرت مسرحية ريا وسكينة بتاعة شادية وسهير البابلى وعبد المنعم مدبولى وقت لما سكينة خلاص هتتجوز عبد العال اللى شغال فى الشرطة وغنوا اغنية نسبنا الحكومة وبقينا قرايب ومين هيعدينا مين يعنى اصبح الزواج مصلحة فى نظر البعض اصبح مجرد وسيلة للربح والتنقل من مستوى الى مستوى اخر دون النظر الى اى عواطف او مشاعر مع وضع الاخلاق والتدين فى خانة المنسى فى هذا الوقت


قومت بعد غروب الشمس وبصيت على البنت وامها وانا ماشى وبصيت للنيل وقولت اة يازمن بنبيع فية الغالى بالرخيص وبقى فى ناس كتير عندها استعداد تدوس على القيم والاخلاق وتهدم كل حاجة حلوة فى حياتنا وتموت كل ضمير صاحى لسة من اجل المصلحة ولو تاتى عن طريق تدمير الاخرين مين يرضية كدة
توقيع الغلبان / شديد ابو حديد