مرحبا بكل الزائرين

مدونتى مدونة عامة الكتابة فيها لاتلتزم بأى قواعد ادبية فهى كتابة بسيطة من القلب الى القلب من دماغى وبقلمى الخشب ت-01225069316

اصدقاء المدونة

الجمعة، مايو 15، 2009

بداية رحلة صعبة



قصة العيون لاتبكى

الحلقة الثالثة

بداية رحلة صعبة



ارسل عميد كلية العيون لاتبكى الى كل من الدكتور نعمان والدكتورة احسان للحضور الى مكتبة وتكلم معاهم عن الرحلة الصيفية التى تقوم بها الجامعة للطلاب كل سنة وابلغهم بانهم هيكونوا المشرفين القائمين بالاشراف على الرحلة احسان هتكون مسئولة عن البنات ونعمان عن الشباب واتمنى عدم حدوث مشاكل باالرحلة واى مشكلة ارجوا الاتصال وابلاغى بيها فورا


وخرج نعمان واحسان من مكتب العميد وهم غير سعداء بهذا الاختيار حيث الرحلة تكون لمدة اسبوع ومع وجود كلا منهما مشرف عليها سيكون هناك الكثير من الاختلاط بينهم والتحدث المستمر وهذا ما لايرغب فية الطرفين من حبهم الشديد لبعض ولكن لاوجود للرفض او الجدال فى هذا الموضوع وكان الامر لهما سلبى لانهم مع بعض فى رحلة اسبوعية وايجابى للحصول على الراتب الشهرى الدبل ثلاث مرات نظير اشرافهم على الرحلة




وابتدى التجهيز للرحلة وتبليغ الطلاب المشتركين فيها بيوم السفر . كانت جامعة العيون لاتبكى وحيث انها جامعة خاصة فكانت تهتم بكل شىء علمى او ترفيهى للطلاب وكانت الجامعة الوحيدة المميزة رغم وجود الكثير من الجامعات الخاصة الاخرى الا انها كانت الاولى دائما .وكانت الرحلة السنوية الصيفية مكانها بالساحل الشمالى فى احدى القرى الجميلة وكانت الجامعة اشترت قطعة ارض وقامت ببناء مبنى سكنى ضخم ليها ليكون مكان الاقامة للطلاب فى الرحلة الصيفية


وجاء يوم الذهاب والبداية للرحلة وكان الاتفاق تجمع الطلاب والمشرفين داخل الجامعة ثم الذهاب منها وعند تجمع الطلاب والمشرفين وركوب الاتوبيس بالجامعة حدث شىء غريب كان غير متوقع افسد مزاج الجميع وغير الرحلة وخط سيرها
دخول اكثر من اربع سيارات ونزول الكثير من الرجال واغلاق ابواب الجامعة واشهار السلاح فى وجوه الجميع

الجمعة، مايو 08، 2009

اشرب قهوتك يوم دفنتك


قصة / العيون لاتبكى

الحلقة الثانية

اشرب قهوتك يوم دفنتك





بعد الموقف اللى عملة نعمان مع احسان كانت احسان حزينة اوى وكانت بتفكر ازى ترد الضربة اثنين لنعمان بس كانت حيرانة هتعمل اية ونعمان ديما حذر وصعب تخد علية غلطة لكن رغم دة كانت من وقت موقف نعمان منها كانت بتفكر بحماس فى كيفية رد الضربة الية وكانت مقتنعة انها كدة مش هتكون غلطانة لانة هو اللى بدء والبادى اظلم.



كانت احسان جالسة بمكتبها حزينة وعمالة تفكر دخلت عليها مها احدى الطلاب الموجودين فى مجموعتها واللى لاحظت حزن احسان وخمنت وعرفت السبب وقالت مها ليها يادكتورة احسان مش تزعلى نفسك وان كان على اللى عملة نعمان اكيد هيجى يوم وتخدى حقك. بصت ليها احسان وقالت ايوة عندك حق ودة اللى بفكر فية بس ازى وهنعمل اية. قالت مها ليها ولايهمك سيبى الموضوع دة عليا وانا هخلصة ليكى يادكتورة احسان



قالت ليها احسان انتى بتفكرى فى اية يامها . قالت ليها الحكاية بسيطة خالص اروح لدكتور نعمان فى مكتبة على اساس انى محتاجة استفسار فى المادة اللى بيدرسها وانا خارجة من مكتبة اعمل انى وقعت وطبعا هو هيجى وقتها يقرب منى يشوف حصل ليا اية هنا هديكى رنة على الموبيل وحضرتك تروحى للعميد وانتى فاهمنى هتقولى اية واتفرجى على اللى هيحصل. بصت احسان وقالت ليها يابنت الاية فكرة جامدة خلاص متفقين امتى وقت التنفيذ. قالت مها كمان ساعة من دلوقتى



كان دكتور نعمان لسة قادم من البيت بسيارتة ونزل منها . وهو داخل الى مكتبة عيونة جت على الجنينة اللى على يمين مكتبة شاف بنت ولد فى احضان بعض قرب منهم وصوتة بقى عالى عليهم وقال ليهم ماشاء الله اية دة انتم بتعملوا اية رد الطالب ابدا يادكتور دى بتشتكى ليا من مشكلة وبحاول احلها ليها . قام ضاحك نعمان وقال لية ونبى اية هو حل المشاكل بالاحضان اليومين دول هات انت وهيا الكارنيهات بتاعتكم وتجونى المكتب لما نشوف اخرتها اية البلاوى دى اللى بتحصل بالجامعة . وسبهم ومشى على مكتبة وهم فى حالة خوف من اللى جى واللى هيحصل من دكتور نعمان..



دخل دكتور نعمان مكتبة وطلب الشاى وجلس يجهز فى المحاضرة اللى هيقولها النهاردة وفجأة خبط الباب دخل البنت والولد اللى كان دكتور نعمان اخد منهم الكارنيهات اول ما شافهم قال ليهم اقعدو وقال ليهم تحبة تشربو اية بصو لبعض وقالوا شكرا يادكتور . رد نعمان عليهم شكرا اية هيا دى تيجى اول زيارة ليكم لمكتبى ومش اقوم بالواجب معاكم وبص ليهم بغضب وقال تشربوا اية. ردوا الاثنين شاى وطلب ليهم الشاى وفضل يكلم وياهم وفتح قلبة ليهم وعرف منهم انهم متجوزين عرفى وبعد الجامعة هيكون الجواز رسمى



وهنا ابتدى يوضح ليهم دكتور نعمان اضرار الزواج العرفى ان كان زواج من الاساس ولايوجد زواج رسمى بدون علم الاهل وهنا قال ليهم انا هجى معاكم لبيت الاهالى وهحاول اقرب البعيد واخليكم زوجين بالشرع والعلن وليس فى الخفاء وقال ليهم انتم اية رايكم . وبين الخوف والحيرة والقلق رد الاثنين اللى تشوفة يادكتور نعمان ياريت احنا نتمنى طبعا ومشى الطالبين من عند دكتور نعمان .



خبط الباب ودخلت مها على دكتور نعمان وقالت لية انها عندها استفسار فى المادة وهنا قال ليها دكتور نعمان اتفضلى قولى واتكلمت وقالت وجت تخرج وقعت على الارض واة يارجلى وهنا دكتور نعمان قرب منها مالك قالت لية رجلى بتوجعنى اة يارجلى وهنا فى الوقت دة كانت احسان راحت للعميد وقالت لية ان نعمان وخد بنت المكتب بتاعة وبيحاول يتعدى عليها وخدت العميد وعلى مكتب دكتور نعمان. وهنا دكتور نعمان قال للبنت حاولى توقفى عليها مش عرفت قام فاتح المكت ونادى على الساعى اللى قوام نفذ تعليمات دكتور نعمان وخد البنت على عيادة الجامعة للكشف عليها وهنا مها مش قدرت تتكلم ورضيت باللى حصل



دخلت احسان والعميد على مكتب نعمان وطبعا العميد مش وجد لابنت ولاحاجة وقال لنعمان انا سمعت وجود بنت فى مكتبك وصوتها عالى هو فى اية . هنا قال لية نعمان يافندم ابدا وحكى لية اللى حصل وهنا فهم العميد الموضوع وقال لااحسان ابقى اتاكدى الاول بلاش افترى ومشى العميد واحسان جت تمشى نعمان قال ليها اتفضلى تشربى حاجة قالت لية لا شكرا اشرب قهوتك يوم دفنتك وهنا نعمان قال ليها الله يسامحك وجلس يمارس مهام عملة بمكتبة وان جيت للحق مين على حق

الاثنين، مايو 04، 2009

سينما دى ولا جامعة








قصة / العيون لاتبكى

الحلقة الاولى

 سينما دى ولاجامعة 




النهاردة هنتكلم عن الاستنساخ وهنكمل ما بدأنا فى الاسبوع الماضى. النهاردة انا جايبة ليكم سلسلة فيلم
Jurassic Park
بمعنى الحديقة الجوارسية وهى من روائع المخرج العالمى ستفين سبيلبرج. ومن بداية اول فيلم فى السلسلة الجميلة دى بنتعرف على تفكير جون اللى فكر فى انشاء حديقة كبيرة فى جزيرة ملك لية وكان عايز تكون حديقة مختلفة عن اى حديقة موجودة فى العالم وفكر فى عمل حديقة تضم حيوانات منقرضة مثل الدينوصور وغيرها من الحيوانات والطيور الجارحة التى كانت تعيش قبل الان بحوالى مئات السنين قبل الميلاد



وطبعا عشان يرجع حيوانات منقرضة وليس لها وجود عن طريق الاستنساخ كان امر مستحيل لان لايوجد اى حيوان يعيش منها لعمل استنساخ منة ورغم انة مستحيل الا جون ما كنشى يعرف حاجة اسمها مستحيل وكان لية صديق عالم اثار فى يوم كلمة و قال لية انة وجد اثناء البحث عن الاثار على هياكل عظمية لبعض الدينوصورات وذهب جون لاالقاء نظرة عليها واكتشف هنا وجود بعض البعوض بجوار العظام متجمد داخل قواقع شفافة شد الموضوع جون واخذ هذة القواقع وابتدى يفكها ويأخذ منها البعوض وبعد عمل ابحاث عليها ابتدى يخد منها الدم ويقوم بالتحليل لية فاكتشف ان الدم هو دم دينوصورات وطيور اخرى جارجة حيث البعوض كان يمتص الدم من الاجسام مثل الان



وبما ان الدم هو من العناصر الاساسية للحياة ابتدى عن طريقة عمل استنساخ لكل الحيوانات المنقرضة من مئات السنين وابتدى الحلم يتحقق لية وابتديت الحديقة كل يوم تكبر وفيها الكثير من الحيوانات الجارحة مثل الدينوصورات واصبحت الجزيرة مكان للحياة مرة اخرى وعودة للحيوانات التى انقرضت . من هنا اعزائى الطلاب انا عايزاكم تشوفة سلسلة الافلام دى وعايزة من كل طالب بحث عن الموضوع وراية فية ومعادنا الاسبوع القادم.


كانت دى محاضرة الدكتورة احسان للطلاب وسريعا ما وصل الخبر للدكتور نعمان اللى ما كدبش خبر وراح لعميد الكلية وقال لية كل اللى حصل من احسان وتوزيعها لدسيهات سلسلة الافلام وشرحها لكل ما فية وان دة خروج عن المنهج الموجود فى الكتاب واحنا يافندم مش فى سينما دى جامعة محترمة ومش بعيد تعلمهم بعد كدة الرقص والهشك بشك. وهنا طلب العميد دكتورة احسان تيجى ليةا لمكتبة وكان فرحان دكتور نعمان اوى وحاسس بنصر لية قادم فى الطريق الية




وجت دكتورة احسان الى مكتب العميد وعند دخولها شافت دكتور نعمان قاعد فى المكتب وهنا كلمها عميد الكلية وشرح ليها ان كدة مش ينفع ودة خروج عن المنهج وان حصل تانى هيكون ليا كلام تانى معاكى . هنا دكتورة احسان قالت لية يافندم انا مش خرجت عن المنهج انا بحاول اخلى الطلاب تشغل دماغها وتفكر افضل من اعطاء كلمتين للحفظ ورايحين بعد نهاية دراستهم . هنا اتكلم دكتور نعمان وقال ليها حضرتك هتشتغلى بمزاجك ولا اية يادكتورة فى نظام متبع ولو تخرجى علية هنا يجب ان يكون فى موقف لعدم هدم البنية الاساسية للتعليم وهنا نظرت لية نظرة غضب ولم تتكلم وقال ليها العميد خلاص كلامى خلص وارجو الالتزام



وخرجت دكتورة احسان وخلفها دكتور نعمان اللى ووهو ماشى كان بيغنى وبيقول ابنك فى العش ولاطار منك وعمال يضحك .قربت منة وقالت لية انت المفروض تكون دكتور حمير وتتدرس فى زريبة مش جامعة هنا شاط نعمان وبص ليها احسان قامت بصت لية وقربت منة وقالت نعمان ولسة الخناقة هتبتدى طلع العميد وهنا كل واحد فيهم قد ظهرة للتانى ومشى وان جيت للحق مين على حق


الجمعة، مايو 01، 2009

بداية الاختلاف والحرب بين احسان ونعمان




قصة / العيون لاتبكى
مقدمة
بداية الاختلاف والحرب بين احسان ونعمان


لكل حرب اسباب تقوم عليها ومع اختلاف الاسباب لايمنع من وجود الحرب والقتال بين اثنين والمؤكد ان اغلبية الحروب يكون فيها احدى الطرفين على حق والاخر على باطل فيها يكون نصر او هزيمة ا الا حرب واحدة كانت بين طرفين كل منهما على اختلاف من الاخر فى نظرة علمية باحتة الى بعض الامور التى تتغير حسب الظروف والاكتشاف العلمى وهى تنتهى بدون نصر او هزيمة واتفاق على عدم الاتفاق


الحرب هنا التى نتحدث عليها كانت بين دكتورة احسان والدكتور نعمان كل منهما حاصل على نفس الدرجة العلمية فى مجالة الا انهما وقع فى مصيدة الاختلاف ولم يعطى طرف فرصة لشرح ظروف الاختلاف وتقريب المسافات بينهما بل على العكس كان كل طرف فى اتجاة معاكس فى اى حدث علمى او اكتشاف يصدر جديد واصبح معروف فى جامعة العيون لاتبكى لاوجود لااتفاق بين احسان ونعمان فى الجامعة ومنها خرجت المشاكل الى الحياة بينهم


كان اول اختلاف يحدث بينهما كان اختلاف فى بحث علمى صدر حديثا يقول ان تناول العلكة اللى هيا اللبان مفيدة جداا لاانسان فهى تساعد على التركيز كما تساعد الانسان عن البعد عن اى مؤكلات دسمة حيث انها تضعف شهية الانسان وبتكون عامل مساعد على انقاص الوزن وكان البحث دة مقتنعة بية جداا دكتورة احسان وفى كل محاضرة تتكلم علية لكل الطلاب


عكس دكتور نعمان اللى كان غير مقتنع بية نهائى حيث كان صدر من قبل بحث يحذر من تناول العلكة اللبان حيث انها تعمل على امتصاص الدم وتعمل على تدمير الفك واللثة ومن هنا حدث الاختلاف والحرب بين احسان ونعمان واصبحت دائما مشتعلة فى ما بينهما دائما واصبح لكل طرف مجموعة من الطلاب الموافقين دائما على ما يقول كلاا منهما


واصبحت الجامعة مليئة بالشعارت التى تؤيد كل طرف فيهم مثل ان جيت للحق نعمان على حق وايضا ان جيت على حق احسان على حق وتقوم المعارك بين الطلاب بسبب الاختلاف العلمى بين الدكاترة الحلوين احسان ونعمان والكثير من الحروب حدثت بين الطرفين ولم يمنعها اى محاولات من الزملاء الاخرين بجامعة العيون لاتبكى وان كانت الحرب الاولى حدثت فأنها لم تنتهى والكثير منها قادم فى الطريق اليك فكونوا فى الانتظار وان جيت للحق مين على حق