مرحبا بكل الزائرين

مدونتى مدونة عامة الكتابة فيها لاتلتزم بأى قواعد ادبية فهى كتابة بسيطة من القلب الى القلب من دماغى وبقلمى الخشب ت-01225069316

اصدقاء المدونة

الجمعة، يناير 22، 2010

كان عشمها فى الصينى كبير


شحاتة زى اى شحاتة بتشحت عشان تجيب فلوس والشحاتة اصبحت موضة الان الكثير دخل الى طريقها رغم قدرتة على العمل والكسب دون ان يمد يدة لااخرين ويشحت وهو جالس على احدى الارصفة او امام مسجد او كنيسة او امام نوادى او اى مكان يمر منة الناس دائما وبكثرة



موقف حصل قدامى حبيت احكى ليكم علية عن شحاتة كانت جالسة امام احدى الكبارى وكان بجوارها عجازين دليل على الاصابة والعجز وكم ورقة بجوارها تظهرهم الى المارين عليها لااستعطافهم واعطائها مال وانا كنت معدى عادى وليس لى دعوة بالشحاتين او يلفتون نظرى لتعودى على ان ارى الكثير منهم فى الشوارع



ولكن ما لفت نظرى وجلعنى اكتب عن هذة الشحاتة هو ما حدث امام عينى بالصدفة وانا بمر من جوارها وبالمكان الذى تجلس فية لمحت الشحاتة فى الشارع المقابل لها مجموعة من الصينين وافقين فقامت وجرت عليهم بطريقة مسرعة وكأنها تخشى ان يذهبون قبل ان تصل ليهم وتأخذ منهم اللى فية النصيب وطبعا الشحاتة من لهفتها على الوصول ليهم تركت العجازين وكانت بتجرى عليهم يعنى سليمة والعجازين ما هم الا وسيلة تستخدمها فى الشحاتة واستعطاف قلوب الناس



المهم روحت وقربت منها ومن الاجانب حب استطلاع واشوف هيحصل اية وازى هتتعامل وياهم وهما هيدوها كم وجدتها بتشاور بايدها على فمها ما معناة عايزة اكل ومعيش فلوس فضل الصنين يبصوا ليها مبتسمين الى ان واحد فيهم طلع محفظتة وادها كم تخيلوا المبلغ 25 قرش وفضة كمان انا بصراحة انصدمت قبل صدمة الشحاتة اللى مددت ايدها وقالت ربع بس دة قليل ممكن زيادة علية



بص ليها الصينى وفؤجئت انة اتكلم عربى وقال ليها مش عجبك هاتية ومشيت الشحاتة لمكانها ومعاها الربع جنية وهيا منفعلة وتقول قمال اجنبى وخواجة على اية روح يعودك بقنبلة انت واصحابك زى اللى وقعت على اليابان وبعدها بصيت عليها وجدتها فى مكانها ليها حق تنصدم كان عشمها فى الصينى كبير وعلى اساس خواجة بقى كان املها تشوف العملة الاجنبية او مصرية من الكبيرة بس صدمها الصينى



بس من كلامها حسيت انها متعلمة وفاهمة يعنى لو جاهلة هتعرف منين القنبلة اللى ضربت على اليابان بلاش دى اسلوبها وحوارها معاهم اكد لى انها متعلمة مش جاهلة وزى ما نسيت العجاز لما شافت الاجنبى اكيد كل هدومها واللى على وشها اكيد مكياج مضروب من اجل تمثيل دور الشحاتة جيداا

هناك 84 تعليقًا:

هي وظروفها يقول...

ايه تامر باشا صباح الفل

نسيت العكاز خايبه صحيح

الصيني ده اشرف منها ميت مره لأنه علي الأقل معدي كام بحر ومحيط عشان ياكل عيش انما هي متعمله مش متعلمه ملهاش عذر متمعل اي حاجه طالما بصحتها تتمارض ليه دي عالم بتستسهل ووشها مكشوف

فكرتني ايام الجامعه كنت بركب ميكروباص العباسيه كل يوم وعلطول لمده خمس سنين يوم ويوم اشوف ست شايله عيل ووبتقول لللي يقابلها ممكن اي حاجه اروح

عندت السنين وشفتها من سنه ولقيتها بتقولي ممكن اي حاجه اروح

قولتلها يا وليه ده انت لو راحه لخالك في البرازيل كان زمان جمعتي حق التذكره

قالتلي انت مالك انت متسبني اشوف حالي
عالم تقطع العيش صحيح
رحت سايبها وماشي

norahaty يقول...

اتهم نفسى احياناً
بقسوة القلب لأنه لا
يرق لأى(شحات)واخد الشحاتة
مهنة لكن حكاياتك اهوة أثبتت لى
أنى على صواب.

norahaty يقول...

لكن برضه ومع هذا
يكفى أنها رضيت أهانة
نفسها

حنين يقول...

موضوع جميل
ومهم فعلا
للاسف كثر جدا موضوع الشحاته
واصبح مهنه لناس كثير
لا والطريف انها بتتأمر


تسلم على الفكره الحلوة

واحد من العمال يقول...

السلام عليكم

يمكن شحاته مؤهلات

ودمت بخير حال

WhItE HeArT يقول...

ههههههههههه تمورة ازيك ياباشا والله وحشني موت

بس ياترى فاكرني له اتنسيت :)

المهم بأه ندخل في صلب الموضوع بصراحه ياتامر الموضوع بأه اوفر اوي وفي فعلا شحاتين متديلهومش يدعوا عليك مش عارف حاسس ان دي بقت وظيفه فعلا

يله خير المهم انك كنت رايح فين تعطلت كل ده بأه :)

تحياتي

مرايتى يقول...

السلام عليكم ورحمة الله وبركاته

دى بقت مهنه وبيتفننوا فى ادائها كمان وياما شفنا من الحاجات دى ايام الجامعه وفى مواقف الميكروباص وبرضه بشوفهم بالصورتين لانهم دائمين مثلا فى الموقف او بشوفهم فى مكان تانى

ومش بس بقت بالمظهر الملخبط والهدوم المقطعه لا أحيانا ناس لابسه كويس جدا وتوقفك وتقول محفظتى اتسرقت او شنطتى ضاعت او عاوزه اكمل مواصلاتى اصل فلوسى خلصت شفنا كتير

بس فى موقف بقى اكتر حاجه اتعجبت لها فى حياتى ست كبيره فى السن لابسه كويس وشكلها محترمه وبتعد فى مكان وتوقف الى رايح والى جى وتقول كيستى ضاعت ومعايش فلوس مواصلاتى دى من قريه جمبينا وبجد تصدقها لانها مش شكل شحاته بس بقيت بشوفها كل يوم ومش مشكله توقفنى تانى مهى ما بتركزش فى الى بتوقفهم تانى وتالت وعاشر لو امكن ونفس الاسطوانه او مع بعض التعديلات
عندنا واحد فى البلد كان برضه من الى بيشحتوا لما مات لقوا فى البيت صفائح فلوس فضه وورق من الى كمان ما بقاش بيتصرف بجد على فكره مش حكايه

تحياتى للصينى

Nostor Azzuro يقول...

والله كلام زى الفل

آخر أيام الخريف يقول...

فعلا شر البلية ما يضحك

sookra يقول...

هههههههههههههههههه
والله ضحكتنى ياتامر
هم يضحك وهم يبكى
يخرب بيت كدا
والله اللى يستحقوا الصدقه مابيطلبوها من تعففهم ونفسهم الابيه
دى ماتستاهلش ان حد يديها اى حاجه
اما موضوع المدونه فموش فاهمه ايه المشكله بس انا كنت قافلاها من كام يوم
حاول تدخل وابقى قولى فيها مشاكل لسه ولاايه
تحياتى

Dr Ibrahim يقول...

ممكن برده يكون مكياج ليه لا
هما يعنى الصينين سابوا بلدهم وجم هنا عشان إيه؟
يشتغلوا ماهى مصر ناقصة بطالة اصلا
دول اشتغلوا مكان الصعايدة بتوع زمان اللى كانوا بيلفوا على البيوت عشان يبيعوا الملابس
ربنا يستر على بلدنا

Girls only يقول...

كويس انة فكر يديها بس باين علية قاعد كتير بمصر يكلم عربى ومش عجبك هاتية

ميرسى للبوست تامر

تحياتى

ঔღঔ نـــوارة ঔღঔ يقول...

هههههههه

يعني فاكراه عبيط وهديها مبلغ محترم

تلاقيه عارف حركات الشحاتين وفاهمهم هههههههههه

الي يقهر فعلا انه في شحاتين شباب وشابات وزي الفل وبيستهبلوا

عندنا مثلا تلاقي بنت شابة ومتعلمة وزي الفل لابسة نقاب وعمالة تشحت كرامتها فين دي

ياساتر على هيك ناس مش بيحسوا على دمهم

ربنا يهدي

دمت بحفظ الرحمن

Tears يقول...

شحاتة و عارفه ان فيه قنبلة و قعت على اليابان....دى باينها مباحث متخفية مش مجرد شحاتة

:)

أميرة الأحلام يقول...

موضوع جميل
بس للاسف بقى كتير قوي
وانتشر بشكل كبير وبقوا ياخدوه على انه مهنه زى اى مهنه تانيه
ربنا يحفظنا من امثالهم
تحياتى ليك

خواطر شابة يقول...

انا لااشجع اعطاء الصدقة لمن يمتهن الشحاتة لانني اعتبر الامر تشجيعا له انا افضل البحث عن المتعففين لمساعدتهم فهم من يستحق

nour shahen يقول...

انت عملت دراسه وافيه علي شخصيتها ما شاء الله
بس فعلا الطرق للشحاته حاليا بقت فن كأنه اتقلب من مجرد تسول لفن نصب وتقريبا الاتنين واحد
قبلت موقف جميل تعاملت معاه بكل سذاجه وهو انى كنت نازله من المترو فى يوم ومريت بسيده باين انها محترمه ولابسه كويس جدا ولقتها وقفتنى وقالتلى ممكن جنيه فمخطرش فى بالى لحظه انها شحاته وفكرت انها عايزه تركب المترو والفلوس ضاعت وبعد ما ادتلها الجنيه وركبت العربيه وعلي ما حملت ركاب بنظر من الشباك لقتها بتكرر نفس الموقف مع كل اللي بيمرو بيها وابتسمت ابتسامه بلهاء من شدة غبائى وفهمت انها شحاته بس موردن وعجبى
تحياتى ليك علي المراقبه والتأمل

حياه بلا عنوان يقول...

السلام عليكم ورحمه الله وبركاته
طبعا ماشاء الله حضرتك بتتكلم عن موضيع حلوه وتستاهل ان الكل يعلق عليها الشحاته دلوقتى بقت متدوله ده دخلهم فى اليوم 2500جنيه يعنى شغل جامده لا يفكر ان مدير يتامر عليهم ولا حتى زميل يتكلم معاه بس للاسف نسيه ان فى ربنا شاهد عليهم انا من حوالى 5سنين بمشى من طريق معين بروح منه المعهد بتاعى المهم كونت بمشى انا واختى واصحابى طول الخمس سنين بنقابل واحد شحات كان بيوزع ورقه اللى هو بيكون بجنيه المهم الشخص ده كان اخرس مش بيتكلم انا جيت فتره اتعلمت الكلام بالاشارات المهم قبلنا الراجل ده فى حته تانيه بيشاور كلمته بالاشاره سبنى ومشى وفى السنه السادسه سبحان الله اللى هى السنه دى سبحان الله الاخرس اتكلم وبقا بيبيع مناديل سبحان الله فعلا حاجه بقت تجنن كل واحد يقول اروح اشحت وخلاص مش عرفين ان فيه ربنا شاهد عليهم البوست جميل قوى فعلا
تحياتى

صيدلانيه طالعه نازله يقول...

و الله موضوع الشحاتين كتر قوى و بقى مقرف و هما بقى عندهم روح الابتكار دايما لاكتشاف اساليب جديده للتسول
بالنسبه للصينيين انا كان ساكن فى العماره اللى جنبى قبيله من الصينيين اللى بيشتغلوا فى المعارض و كانوا يجوا يشتروا دوا و يفاصلوا فى تمنه و الله و يقوللى كل الصيدليات بتعمل خصم
شفت البجاحه
بس موضوع جميل بجد

تأثير الفراشة يقول...

للأسف موضوع الشحاتة ده شىء مخجل لنا و بلدنا، خصوصا إن صحتها كويسة و تقدر تشتغل

و الصينيين سابو بلادهم و جُم لحد مصر علشان يشتغلو و يتعبوا

يا ريتها بدل ما تتدعى عليهم كانت تتعلم منهم احسن

لا حول و لا قوة إلا بالله

Amira يقول...

الشحاتة بقت افة من افات العصر دة والواحد مش بقى عارف مين فقير ويستهل من اللى قادر وبيشحت

ياريت تتعلم حاجة من الصينى

تحياتى

Amira يقول...

الشحاتة بقت افة من افات العصر دة والواحد مش بقى عارف مين فقير ويستهل من اللى قادر وبيشحت

ياريت تتعلم حاجة من الصينى

تحياتى

فكرة من الزمن ده يقول...

والله ضحكتني يعني الصينين تفوقو علينا حتى في الشحاتة
يعني شحاتة طلعت بتشحت من شحاتين
خايبين في كل حاجة يعني
تحياتي

العيسوى الصغير يقول...

ههههههههههههههه

اكيد يعنى زمانهم بقاوا بياكلوا فول وطعمية كمان
و التانية دى شحاتة هابلة صحيح

شربات يقول...

شحاتة مدول اليومين دول

ممن تبحث عن الربح السريع والسهل

بوست مميز

تحياتى

ألآسطى بلية يقول...

اجنبى مين دة الصنيين دول يعرفو الكوفت زى الكنوفو هههه

المرة الجاية تروح لااجنبى امريكى وى هندى وتبعد عن الصينى خالص

تحياتى

مجرد انسان يقول...

الصينى طلع ناصح وفاهم الفولة بس غريبة فى شحاتة تنسى مؤهلاتها فى الشحاتة اقصد العجاز باين نسيت نفسها وعايزة تدريب ههههه

تحياتى

كلمات من نور يقول...

الله...دي كان ناقص تقول قنبلة هيروشيما ونجازاكي ...تعرف يا أخي تامر من فترة كنت باشتري حاجات وفجأة لقيت رجل محترم جدا ماسك واحد شحات أصم و أخرسوعمال يشتمه ويشده من هدومه وطبعا اتجمع الناس و الراجل بيصرخ داه لسه كان امبارح في الشارع اللي تحت بيتنا بأيد ورجل مقطوعين طلعوله امتى دول وصوته وودانه راحوا؟؟؟؟؟؟؟؟؟؟قلت لا إله إلا أنت سبحانك إني كنت من الظالمين...بقى احتراف

شمس يقول...

كويس انها نالت من الصينى ربع جنية دول عالم بتوع سوق وشغل

بس كلامك اكد لى ان فى شحاتين كتير مش محتاجين وبيشحتوا

تحياتى

شمس يقول...

كويس انها نالت من الصينى ربع جنية دول عالم بتوع سوق وشغل

بس كلامك اكد لى ان فى شحاتين كتير مش محتاجين وبيشحتوا

تحياتى

نورألآيمان يقول...

السلام عليكم

لاحول الله يارب

الانسان مدام قادر على جلب رزقة با العمل الحلال فواجب علية ان يجتهد ويعمل افضل من ان يشحت

جزاك الله خيرا على الموضوع

Mr.Hazem يقول...

المشكلة انه بزمانا هادا بطلنا نعرف المحتاجين من المتسولين

لأنه كتير صاروا مهنتهم هو التسول

الوفية للأبـــد -- مها أحمد يقول...

هههههههههههههههههههههههه

الله يا تامر قصة حلوة اوي و الله
و على فكرة بتحصل كتير اوي و بقت موضة غريبة و على فكرة بتخلي منظر المدن و الشوارع غاية في الوحاشة و لو قلنا كده تلاقي فيه ناس يقولولك هي جت على دول سيبوهم يسترزقوا

بس اللي ما يعرفهوش ان ربنا ما امرناش بكده
امرنا لو محتاجين نسعى بكل ما فينا و هو هيرزقنا
بس الناس دي كلهم متواكلون على الله مش متوكلون

ربنا يهدي الجميع يا رب
و يرزق كل الناس يا رب

مع خالص تحياتي و تقديري

بحر الالوان يقول...

والله يا اخ تامر ... مملكة الشحاتين في مصر كل يوم بتكسب اعضاء جدد ..... بس من اختلاطي بيهم في فترة المراهقة ... لاني كنت فضولي شوية اياميها ومازلت .... اكتشفت ان 90% منهم شحاتين صيني ..... ياعني اونطة .... دا انا حتي اكتشفت ان الشحاتين لهم ستايلست وناس بتالف لهم الدعوات .... والناس دي بتاخد فلوس جامدة في تاليف الدعوات .

اما الاخوة بتوع الصين ما بيمشيش معاهم نظام العشم ده

تحياتي

المسلم الصغير يقول...

السلام عليكم ورحمة الله وبركاته...
تسلم ايدك على الموضوع الجميل دة طول عمري لا اعترف بالشحاتين لان اعرف واحد شحات ومعاه برجين والله العظيم ومنين كل دة من الشحاته المفروض ان الواحد لما يحب ان يساعد حد يكون متأكد انه يستاهل المساعدة
شحات وبيتأمر (عايز عيش فينو)
دومت بخير

Tamer Nabil يقول...

هي وظروفها

عالم وشها مكسوف واكيد نسيان كويس عشان الناس تعرف انها سليمة ومش محتاجة

والصينى رغم اختلافى معة الا انة كفاية زى ما انت قولت راجل سايب بلادة عشان الرزق

هتعمل وياها اية دول نوعية من الناس اتعودت على كدة واقلمت نفسها على الشحاتة

مع خالص تحياتى

Tamer Nabil يقول...

norahaty

مش كل اللى بيشحت زى الست دى رغم انى مقتنع ان المحتاج بجد مش هيفكر يشحت كرامتة هتوجعة

مع خالص تحياتى

Tamer Nabil يقول...

حنين

لازم تتامر مش شغلها وبعدين اجنبى كانت فاكرة هتصعب علية بس طلع عقر تمام

الله يسلمك

مع خالص تحياتى

Tamer Nabil يقول...

واحد من العمال

وعليكم السلام ورحمة الله وبركاتة

اكيد ممكن تكون مؤهلات الشحاتين دلوقتى فى نوعية كبيرة منهم مودرن

مع خالص تحياتى

Tamer Nabil يقول...

WhItE HeArT

الله يسلمك انا بخير ازيك انت واية الغايبة دى كنت فين

انا معاك هيا بقت وظيفة للبعض

لاغنى عنها ليهم

كنت مروح مفيش تعطيل هههه

مع خالص تحياتى

Tamer Nabil يقول...

مرايتى

وعليكم السلام ورحمة الله وبركاتة

الموضوع بقى انتشر ولية اشكال وانواع مختلفة يعنى زى الوظيفة بالظبط وكل فترة تجدى طريقة جديدة للشحاتة

ولسة ياما نشوف الجديد من ها النوعية من البشر

مع خالص تحياتى

Tamer Nabil يقول...

Nostor Azzuro

باين الفكرة دخلت دماغك وعايز تجرب ههههه

مع خالص تحياتى

Tamer Nabil يقول...

آخر أيام الخريف

عندك حق بس هو دة الواقع الموجود فى حياتنا

مع خالص تحياتى

Tamer Nabil يقول...

sookra

عندك حق سكرة المحتاج بجد كرامتة مش تسمح لية يشحت

خلاص كدة اتحلت ما كنتش اعرف امك قفلتى المدونة

كلة تمام

مع خالص تحياتى

Tamer Nabil يقول...

Dr Ibrahim

عندك حق فى كلامك بس ياريت الشباب

يشتغل واى حاجة وحكاية مؤهلى لايسمح ينساها فى الظروف التعبانة دى

مع خالص تحياتى

Tamer Nabil يقول...

Girls only

على رايك كويس انة فكر يدها حاجة اغلبية الصنين الان فى مصر تتكلم عربى ولو مكسر

مع خالص تحياتى

Tamer Nabil يقول...

ঔღঔ نـــوارة ঔღঔ


ما هو عشان مفيش احساس الشحاتة بقت مهنة وحاجة عادية عندهم

مع خالص تحياتى

Tamer Nabil يقول...

Tears

لية لا بجد ممكن تكون مباحث ولا مرشدة هههه

كل شىء جايز

مع خالص تحياتى

Tamer Nabil يقول...

أميرة الأحلام

عندك حق موضوع اصبح منتشر بطريقة كبيرة واللى اتعود على كدة عمرة ما هيفكر فى مهنة ثانية

مع خالص تحياتى

Tamer Nabil يقول...

خواطر شابة

وانا اتفق معاكى خواطر فى كلامك

مع خالص تحياتى

Tamer Nabil يقول...

nour shahen

اكيد نصب لان الشحات انسان غير محتاج وقادر على العمل

زى اللى قبلتيها فى كتير ياما والحكاية عادية عندهم

مع خالص تحياتى

Tamer Nabil يقول...

حياه بلا عنوان

دى مسرحية كبيرة وكل فترة تتغير الادوار مرة اخرس او اعرج او اعمى المهم اى حاجة متقنة عشان ينصب على الناس صح

مع خالص تحياتى

Tamer Nabil يقول...

صيدلانيه طالعه نازله

مش صينى لازم يفنن هو كمان انا خايف فى يوم اصحى اجد البلد كلها بقت صينين وتبقى احتلال هههه

مع خالص تحياتى

Tamer Nabil يقول...

تأثير الفراشة

عندك حق فى كلامك ياريت تتدور على لقمة عيش شريفة بس اللى جرب الشحاتة اعتقد صعب يغيرها

مع خالص تحياتى

Tamer Nabil يقول...

Amira

عندك حق مت كترهم الامر بقى مرعب محدش بقى عارف اية بيحصل بالظبط

مع خالص تحياتى

Tamer Nabil يقول...

فكرة من الزمن ده

شحات من شحات ما هى بقت لمة كبيرة ومحدش عارف فيها حاجة ربنا يسترها

مع خالص تحياتى

Tamer Nabil يقول...

العيسوى الصغير

هما تجدهم خلاص بقو مدمنين فول هههه

ومعاك الست الشحاتة هبلة

مع خالص تحياتى

Tamer Nabil يقول...

شربات

واى ربح سريع اكيد ربح اكثر من خيالى

مع خالص تحياتى

Tamer Nabil يقول...

ألآسطى بلية


هههههه

كلامك سليم لازم تدور على اجنبى غير الصينى

مع خالص تحياتى

Tamer Nabil يقول...

مجرد انسان

عشان تنكشف واكيد مش هتجلس بعد اليوم دة فى نفس المكان

مع خالص تحياتى

Tamer Nabil يقول...

كلمات من نور

معاكى فى كلام حضرتك الامر بقى احتراف على مستوى كبير

مع خالص تحياتى

Tamer Nabil يقول...

شمس

كلامك صح ناس بتوع شغل بس ربع جنية على اساس انهم حاجة كبيرة بقى هههه

مع خالص تحياتى

Tamer Nabil يقول...

نورألآيمان

وعليكم السلام ورحمة الله وبركاتة

كلامك سليم نور ويارتهم يسمعوة ويتعمل بية

مع خالص تحياتى

Tamer Nabil يقول...

Mr.Hazem

عندك حق حازم الامر اصبح فى لخبطة من كثرتهم

مع خالص تحياتى

Tamer Nabil يقول...

الوفية للأبـــد -- مها أحمد

عندك حق فى كلامك مها

ناس عايزاها سهلة مش صعبة وكمان ربحها خيالى

ربنا يهدى الجميع

مع خالص تحياتى

Tamer Nabil يقول...

بحر الالوان

كلامك سليم واتفق معاك

الصينى صح مفيش عشم ينفع معاة

مع خالص تحياتى

Tamer Nabil يقول...

المسلم الصغير


وعليكم السلام ورحمة الله وبركاتة

كلامك صحيح اخى بس نقول اية دول ناس خدت على كدة


مع خالص تحياتى

max.adams يقول...

تباً للإستسهال
تباً لهم

و الصينيين مش جايين يتفسحوا هنا دول ناس جايين تشتغل
مش معقول قطع نص الكره الأرضيه لحد هنه عشان حتة شحاته تقرطسه
ههههههه

فكرتني بموقف واحد حكاهولي عن وحده " صينيه " كانت معاها بضاعه في شنطتها الكبيره و شاب تعدى عليها جنسياً ، تخيل عملت ايه .... ههههههه خلعت الشنطة و جرت وراه لحد ما قطعت نفسه و عدمته العافية و رجعت شالت شنطتها و مشت و كأن شيئاً لم يكن
بجد يا جماعه الناس دول بني آدمين بجدو مش بيعتمدوا على أي ظروف أو غيره

تحياتي لك و لأفكارك الحرة

دكتور لغة العيون يقول...

الشحاتة بقت افة من افات العصر دة والواحد مش بقى عارف مين فقير ويستهل من اللى قادر وبيشحت

ياريت تتعلم حاجة من الصينى

تحياتى

دكتور لغة العيون يقول...

الشحاتة بقت افة من افات العصر دة والواحد مش بقى عارف مين فقير ويستهل من اللى قادر وبيشحت

ياريت تتعلم حاجة من الصينى

تحياتى

بنوتة يقول...

ولسة ياما نشوف فى عالم الشحاتة هذا

تحياتى

فارس عبدالفتاح يقول...

مش كلهم كده يا اخي الفاضل

لسة نونة يقول...

شحاتة مش محتاجة وتشحت لية بس ما تشتغل افضل ليها
كويس كدة لما الصين هانها
تحياتى

محظوظة يقول...

عينى ياعينى الصينى طلع ابيض ياورد عينى ههههههههههههه

خليها فى المصرى تكسب قلبهم ضعيف وحنين

سلاموزززززززززز

SaRa يقول...

الشحات موجود منذ زمن بعيد ولكن هذة الايام يوجد الكثير منهم مثل اللى اتكلمت عليها قادرة على العمل وجلب الرزق الحلال ولكن تشحت
استسهال

تحياتى

Tamer Nabil يقول...

Blogger max.adams

عندك حق ياصاحبى فى كلامك

الصينى جاى يشتغل وفاهم وانسان واعى ومش ممكن اى حد يقدر يقرطسة بسهولة

شوفت حكايتك البنت عملت اية وكملت طريقها بعد ما حاولت تخد حقها

مع خالص تحياتى

Tamer Nabil يقول...

Blogger دكتور لغة العيون

عندك حق احنا بقينا فى وقت كل حاجة قدامنا مختلطة

مع خالص تحياتى

Tamer Nabil يقول...

Blogger بنوتة

اكيد لسة ياما هنشوف كل يوم فى الجديد والجديد

مع خالص تحياتى

Tamer Nabil يقول...

Blogger فارس عبدالفتاح

انا معاك اخى فارس مش كلهم كدة بس نوعية منهم وكبيرة بهذا الشكل

مع خالص تحياتى

Tamer Nabil يقول...

Blogger لسة نونة

المفروض تشتغل مدام قادرة افضل من الشحاتة والاهانات دى

مع خالص تحياتى

Tamer Nabil يقول...

Blogger محظوظة

ايوة المصرى طيب وحنين وقلبة بيضعف قدام الحاجات دى طبعا عكس الاجنبى

مع خالص تحياتى

Tamer Nabil يقول...

Blogger SaRa

ما هيا الست دى فعلا من نوعية الاستسهال والكسب دون عمل

مع خالص تحياتى

علاء سالم يقول...

السلام عليكم

للأسف فعلا الشحاته أصبحت مهنه سهلة لمن لا يريد العمل وليست فقط لمن لا يستطيعون
ربنا يهدي الجميع لما فيه الخير

wasf_elahsas يقول...

بمناسبة الشحاتين هحكيلك علي حالتين اولي اعرفها والتانية ماما ال حكتلي عليها
الاولي
كان في واحد جنبنا بيشحت تخيل وانا عندي خمس سنين كنت بشوفه
ولحد دلوقت برده لسه بيشحت بس بيقف في مكان تاني يعني اكتر من 17 سنة بيشحت تبقي مهنة مربحة ولا لا ليه يتعب نفسه بقي
الحاله التانية
واحدة شحاته بتتسول في الشارع علنا بصوت عالي بعد ما خلصت مهمتها
راحت في شارع متداري جنبنا وراحت شايلة لبس الشغل ولبست لبسها النضيف ومشت عادي خالص
الشحاته دي صنعة