مرحبا بكل الزائرين

مدونتى مدونة عامة الكتابة فيها لاتلتزم بأى قواعد ادبية فهى كتابة بسيطة من القلب الى القلب من دماغى وبقلمى الخشب ت-01225069316

اصدقاء المدونة

الثلاثاء، يونيو 28، 2011

فين الكتف فين اللحمة


فى ناس تقول دينية وناس تقول مدنية

وناس تقول مفيش احلى من العلمانية

وناس تقول لكدة ولا كدة عايزاها ديمقراطية


والشعب والله كتير مخنوق

من كلام عجيب بيدوق

ولافارقة معاة تبقى اية

المهم يشوف تغير تحلو بية كدة ايامة


مش ناس تقول كدة اى كلام

ممكن تكون مش فارقة معاة

ولا عارف كدة اية جواة

ماشى كدة مع الماشية

واللى بكيسب يبقى معاة

لافية مبادىء ولا افكار

تتغير حسب الاحوال

واللى كان من يوم كسبان

صبح دلوقتى خسران

صبحت مولد صبحت زحمة

ولاحد عارف فين الكتف فين اللحمة

ولا مين صح ومين غلط

ولا اية الفرق بين الطوب والزلط

مش بقولك زحمة وناس صالحة

تايهة وسطها

وناس ظالمة ظاهرة وسطها

وناس ايدها على خدها

وجع دماغها الانتظار

وطال معاة عذابها وجرحها

فيلم وابتدى ومحدش عارف

فين وامتة تكون نهايتة

وهتبقى حزينة ولا سعيدة

العلم عند الله رب الحياة والكون

تعالة ندعى من القلوب

تكون النهاية حلوة سعيدة

وخير الامور تكون وسطية




عايزك تعرف انى بحبك


بحبك حب صعب يتوصف صعب الكلام علية

بس القلوب بنظرة عين بيتعرف كدة فيها اية


وانت عارف قد اية قلبى حبك داب فى حبك قد اية

ومهما كان الكلام بيريح لغة السكوت احلى حبيى واريح

كفاية ابص انا فى عنيك واتهوة وانسى الدنيا كدة بيك

وتضحك ليا الايام ياسلام على الحب ياسلام


اجمل احسلس فى الدنيا لما تلئى حبيب بيحبك

بيخاف عليك

وتبقى كل الدنيا فى عينة شمسة وقمرة واحلى سنينة

ويبقى كل ما ليك


ياحبيبى يا احلى قمر يامعلم قلبى السهر

عايزك تعرف انى بحبك وحبك نصيبى وقدر


عايز اقولك حاجة كمان قبل ما انسى قبل ما انام

دة لو عرفت حبيبى انام ياللى شغلنى ليل ونهار

انت الدنيا بما فيها اموت ولا اعيش انا فيها

من غيرك اية انا بس اكون

واية تسوى الحياة ياحبيى لو مش جنبى

حبيى كدة فيها






الأحد، يونيو 26، 2011

ياحكومة ثورة ياعصام ياشرف


سالونى الناس عايز اية من الحكومة وتتمنى اية

قولت عايز كل خير منها فى كل اللى بتحكى وتقول علية

مش عايز اسمع كلام وبس عايز يبقى الكلام افعال

يطيب ويريح شعب عظيم طال الانتظار بية

مش بس مجرد كلام مسكن يتقال


ياحكومة ثورة ياعصام ياشرف مع حفظ الالقاب

حلو الكلام حلو جميل بس الفعل بيكون احلى كتير

عارفين الحمل تقيل بس انت قدها كتير


عايز اشوف افعال تكون خير لبلدنا وتحس بيها الناس

تغير فى حياتها من صعب الى راحة واجمل احساس

والله مصر الخير جواها ارض خير شعب طيب

بس عايزة بداية صح مبنية صح على اساس



الجمعة، يونيو 24، 2011

يسعدنى اتعرف بيك


 
كان قاعد كدة اة فى بيتة بين دفتر وقلم يكتب

فجأة كدة رن التليفون وسمع صوت بلبل يطرب

قال لية مين كدة اة ويايا    قال ليا معجب بكتابتك ممكن اتعرف بيك

قولت لية اهلا كدة بيك يسعدنى اتعرف بيك من يومها منة بقرب



وبقى يتصل كدة بيا

وانا كمان اتصل بية

نسأل على بعض ونطمن 

 تفكير واحد فيا وفية


يمكن بنا مسافة بعيدة بس بحس انها قريبة

احساس تانى وشكل تانى بيخلى الفرحة اكيدة


من اول مرة اتكلمنا قولنا حكينا فى ياما كلام

حسيت انة قريب منى قابلتة فى يوم من الايام


مش عارف لية شقلب حالى واجى اتكلم ما اتكلمشى

يطلب منى انى اتكلم واجى اتكلم انا ما اعرفشى


بس كدة بينى وبينكم مجنون بيا ومجنون بية

يمكن فى جوايا حاجات مش عارف احكيها انا لية

..ولسة ما بنا شىء مفصول يفصل كدة بينى وبينة

وهيبقى كامل مظبوط بس نصبر خمسة علية





الأربعاء، يونيو 22، 2011

ام حسين كانت جارة


من كم شهر عدى كدة فات كانت ليافى حكاية

وحصلت كدة كم مرة حسيت بملل بلا نهاية

ام حسين كانت جارة ست كبيرة وحبوبة

من بعد ما مات كدة حوزها اشتغلت بعدو خطابة

كانت دى فكرتها تشغل بيها وقت فراغها

وديما كانت زيارتها مش اى زيارة فى الحارة


ديما كانت تيجى لينا وفى ايدها كدة كم صورة

لبنات حلوين وبنات طعمين وتقولك اختار صورة

كنت ببص كدة ليها واشوف فى عيونى امى فرحة

زى ما اكون كدة اجوزت ومعايا عروسة بطرحة


افضل اقول كدة اى كلام وهحاول اجرى كدة اهرب

ماهى مش بيعة ولا شروة ولاطقم جديد علشان اجرب


وكنت تملى اقول بصراحة مش نافعة فيهم واحدة

عشان اهرب من الموقف اعمل اية حاجة غريبة



كنت بقول لجارتنا وامى معاها فى نفس الوقت

الموضوع قسمة ونصيب ولكل واحد كدة وقت

يوم ما هتيجى اجرى عليها وحبى هيبقى مالهوش حد

سبونا نفكر براحتنا والمكتوب هتشوفة العين

القصة مش كم صورة هتيجى الفرحة وياها

الموضوع كدة عايز صبر بكرة هيجى فى اقرب وقت



الاثنين، يونيو 20، 2011

اية اللى حصل دة فى المحكمة


اية اللى حصل دة فى المحكمة

وازى ينسكت علية ودة خروج عن الادب

والاحترام المتعارف علية

وكمان يحصل فى محكمة ومن محامين

ومفيش حساب لية

دة اقل حاجة على اللى حصل منهم

حبس 24 ساعة لان اللى حصل منهم مقصود


فى محكمة جنايات اسكندرية أثناء استئناف نظر القضية

المتهم فيها ستة من القيادات الأمنية


قام محامى الضباط باستفزاز الأهالي بإشارات خادشة للحياء

ومحامى تانى معاة قال دول شويت عيال صيع


وكل اللى حصل للمحامين دول الجيش خرجهم برة قاعة المحكمة

والجلسة صبحت معلقة بسبب ما حدث

ما هو كان قصدهم تعطيل الدعوة باللى حصل منهم

دول كان اقل حاجة حبس 24 ساعة زى ما قولت للخروج عن الادب والاحترام

اهانة للااهالى الشهداء واهانة للمحكمة والقضاء

ودى اقل حاجة مش خروج من القاعة وبس

لان اللى حصل دة ممكن يحصل تانى وبطرق اخرى

لان مفيش حساب من الاول فى اللى حصل اول مرة



السبت، يونيو 18، 2011

من الكدب قولى هتكسب اية


اكدب ما تكدب هيبان عليك

مهما تخبى هيبان عليك

الكدبة صفة مش محبوبة

والاصل تملى احلى من الصورة

اعرف كدة لو مش عارف

مابقولشى ليك انا فزورة


تكدب كدة يعنى منافق

دى بينة واحدى صفاتة

من الكدب قولى هتكسب اية

وفى دنيتك لو حتى كسبت

فى اخرتك هتعمل اية


ياصاحبى الدنيا دى مش مضمونة

بتروح فى ثانية وفى ثانية تبقى معدومة

وبدل ما يبقى فى كتابك صفة تتعرف بيها انك كداب

هتقول ساعتها اية لربك راح تتمنى يومها

تبقى تراب




الخميس، يونيو 16، 2011

ضربتها ضربة قوية


ماشية على الخطوة والخطوة حلوة وموزونة

لو جاية من بعيد الناس تقول الحلوة الامورة

شغلت قلوب الناس وبنات كتير غارت منها

وكتر الكلام وخطوتها صبحت حدوتة


الحلوة صبحت خطوتها للكل صبحت معروفة

والعين منين تروح عليها محطوطة

عدت ليالى عدت شهور والخطوة صبحت مدفونة

قعدت فى بيتها قعدت كتير الحلوة كانت مكسورة


العين ما ترحم كسرت الحجر ودى معروفة

ودة انسان جنب الحجر اية تكون قوتة



العين بتحسد وفى الحسد قوية ومغرورة

ضربتها ضربة قوية وساعات بتبقى مش مقصودة

قُلْ أَعُوذُ بِرَبِّ الْفَلَق مِن شَرِّ مَا خَلَقَ*.

احمينى يارب من كل نظرة مش مرغوبة



الاثنين، يونيو 13، 2011

احول بس طيب وامير


مش عارفة اعمل اية فى دة رجل اية مفيش خالص احمر

احمر اية بس دة شكلة الالوان كلها ضاربة عندة

الرجل دة حلاق على ناصية حارتنا وكل يوم رايحة الشغل او راجعة منة لازم اعدى علية قدرى ومكتوبى اهرب منة على فين

دة حتى لو اجوزت هعيش فى نفس الحارة اصل الواد جارى وبيموت فيا

صحيح احول بس طيب وامير اة ونبى والوحدة دخلت على التلاتين ماصدقت بقى انى لفت النظر الكريم لسيادتة


والحول دة مصلحة والله على الاقل لما يحب يبص ليا عينة هتيجى على واحدة تانية كل نظرة ودة هيبقى تغير وتجديد يعنى مش هيمل منى ابدا

المهم الحلاق بقى مش سايبنى فى الرايحة ولا الجاية وهات يامعاكسة ابص لية بقرف مفيش فايدة اشتكى لية للواد خطيبى يقولى حاضر هروح اعلمة الادب

وكل مرة يغلط مرة يروح يضرب البقال ومرة بتاع الخضار دة كان مرة هيضرب ابويا وهو قاعد على القهوة افتكر انة الحلاق


قولت مفيش فايدة ولازم اتعامل مع الحلاق بنفسى عملت مية بشطة وحطتها فى شنطتى وانا خارجة

اول ما جيت وقربت على الحلاق ايدى على شنطتى قام الحلاق وقال ياعينى على اللحمة البيضة ولسة بيقول الوسط رميت المية بشطة على وشة ومشيت

وانا راجعة اخر النهار وجدتة وقفنى تانى وقال ليا ونبى شطة بس على قلبى عسل يابطة نفخت ومشيت


روحت للواد خطيبى تانى وقولت لية شوف بقى انت لازم تروح للحلاق دة وتحلق لية وتظبطة على كل اللى بيعملة فيا فى الرايحة والجاية لااحسن ونبى ما هجوزك

الواد خطيبى راح ورجع مبسوط وقال ليا خلاص ظبتة تانى يوم وانا خارجة وجدت الحلاق بيعاكس فيا

رجعت على الواد خطيبى وقولت لية انت ظبطت مين بالظبط قال ليا ونبى الحلاق يابطة

خدتة من ايدة على الحلاق وهناك قال ليا اهو ونبى هو دة قولت لية قمال بيعاكسنى لية لسة قال ليا مش عارف

ممكن عشان عورتة وانا بحلق لية دقنة



الخميس، يونيو 09، 2011

هروب الريس الى لندن


مش ممكن يهرب من عملتة السودة دى ابدا هو فاكر نفسة اية

فى قانون ومحاكم نهار يومة اسود ومنيل بستين نيلة

ازى يعمل كدة معايا بعد كل اللى عملتة عشانة

بعد ما كان ولا حاجة خلتة بقى حاجة

بقى نجم الشارع والحتة وبقى يطلع فى الكلام

على الناصية والقهاوى

بس ما اشوفة الريس محتاس دة قال ريس قال

فى ريس يسرق ونبى ما هسيبة لحد ما اخد حقى منة

من بكرة اقطع تذكرة وعلى لندن عدل اجيب المنيل على عينة

اللى خد منى احلى ما املك قطتى بسبس

ياترى عاملة اية دلوقتى يا بسبس

ياخوفى الريس محتاس ياكلك ولا يبيعك

جاية ليكى بكرة ياحبيبتى

استرها يارب



الجمعة، يونيو 03، 2011

اخوكى العزيز فى انتظارك


مش معنى انى كنت بكلمك وديما لو غبتى يوم اسال عليكى

مش معنى انى اضحك معاكى واقول احلى الكلام قدامك

يبقى بحبك

مش معنى انى ببص ليكى وبحب ديما انى اشوفك

مش معنى اهتمامى بيكى وخوفى عليكى

انى بحبك

انتى مجرد اخت عزيزة على قلبى بتمنى ليها الخير من قلبى

انتى بنت جميلة ومؤدبة واخلاق وكل حاجة طيبة فيكى

واكمنى محروم ولا كان ليا اخت بنت لما شوفتك ارتحت ليكى

واخترتك اخت ليا

اخت ارتحت ليها والايام قربتك ليا وبقيت احكى ليكى كل حاجة

عن حياتى

مهما كانت كنت بقولها ليكى وانتى كمان كنت بتحكى ليا كل حاجة

ودة من حب ومعزة الاخ للا اختة والعكس كما كنت ارى

انا اسف لو جرحتك من غير قصد

مفيش حد فى حياتى

وانتى بالنسبة ليا هتفضلى اجمل وارق واصدق اخت قابلتها فى حياتى

وبدعى ليكى من كل قلبى تجدى نصك التانى ويكون قدير بيكى

وبقلبك الطيب

عودى كما كنتى اخت عزيزة اخوها قلقان عليها

وبيسال عليها وعايز يطمن عليها

كونى كما كنتى ولاتغلقى ابواب الحياة امامك

اخوكى العزيز فى انتظارك

مع خالص تحياتى