مرحبا بكل الزائرين

مدونتى مدونة عامة الكتابة فيها لاتلتزم بأى قواعد ادبية فهى كتابة بسيطة من القلب الى القلب من دماغى وبقلمى الخشب ت-01225069316

اصدقاء المدونة

الأربعاء، أكتوبر 31، 2007

كان فيها اية لو جبت الولاعة من الدولاب



علبة كبريت كنت لسة شريها
مش عارف راحت فين بدور مش لقئيها
نسيت خالص حطتيها فين
دة انا كنت لسة جاى من برة مش بقالى كنير
----------------------------
يادوبك غيرت هدومى وعلقتها على الشماعة
وقولت اخد دش عشان افوق وابقى فرش
رجعت ابص مش لقئيها بصيت لنفسى واستغربت
-----------------------------
قلبت البيت دورت فى كل ركن وفى كل مكان
دورت ومفيش فايدة مش لقئيها
شىء يحير شىء يجنن اية الورطة دى اللى انا فيها
------------------------------
معقول فات كل الوقت دة معقول اللى انا فية دة
ماكنت جبت الولاعة من الدولاب ولاضيعت كل الوقت دة
بجد حرام دة كلام يضيع كل الوقت دة فى شىء ما يستهل
-------------------------------
هو خلاص مفيش غيرها معقول كان كل دة تفكير
متقولشى الغالى اللى شغل بالى ولا الحب الكبير
ازمة وبسبب ما لية لازمة وانا الغلطان لانى عملت لازمة
لشىء مالو لازمة
--------------------------------
لان كان فية بديل موجود بس مافكرت كويس وكان تفكيرى محدود
لو ركزت ثوانى لو غيرت مكانى كنت عرفت وصلت للحل التانى
من غير مايضيع كل الوقت دة

الأحد، أكتوبر 28، 2007

الكل يجرى ويستخبى الا انا








بحب المطر ولما ينزل


الكل يجرى ويستخبى الا انا


اجرى علية واستقبلة واغنى لية


واكتب كلام ماحد قالة


قبل منى عن المطر


-------------------------


وفى عز المطر بحب امشى فى الشوارع


تتبل هدومى ما تتبل بيذيد الحب وعمرة ما اقل


تبص الناس عليا تقول مجنون


اقول مفتون وعشقى لية فى قلبى ولو جنون


دة خير ياناس ومش ليا بس دة لكل الكون


--------------------------


فى نزول المطر بأحس بالسعادة والفرح


بأحس انى طير طاير بدون جناحين فوق فى السما


بأحس انى اتخلقت من جديد وليلة المطر ليلة عيد


معايا ولا مش معايا انا بية احساسى وعشقى بيذيد


----------------------------


رغم انى بطبعى بتأقلم على اى فصل


من فصول السنة وبرضى بية ولا برفض وجود لية انما


الشتاء ومطر الشتاء لية معزة


عندى وغالى على قلبنا


-----------------------------

الأربعاء، أكتوبر 24، 2007

بنت البنوت لاتقولى اسد ولاحوت

قال ليها بحبك/ قالت لية بحبك

وخلص الكلام بتصريح الغرام
وسكتت القلوب بعد كلمة بحبك
-------------------------
عايش بالامل ولايعرف الملل
وطيب وصريح انسان فعلاا فى التعامل مريح
لكن امل كداب محتاج الف باب وباب يتفتح
علشان يتحقق الامل
--------------------------
ذكى وطموح لكن من غير قلب وروح
كل اللى همة انة يوصل ويبقى فوق
مش مهم على حساب مين مش مهم مين بسببة يكون مجروح
-------------------------
حلوة وزى القمر تعشق الليل والسهر
بنت البنوت لاتقولى اسد ولاحوت
كفاية نظرة منها تتعلم بعدها الليل والسهر
-------------------------
موظف غلبان لكن حاسس بالامان
حارس وغفير شغال بضمير
يتأمن على الدهب والماس ولايغرى عينة حرام
مهما كان
--------------------------
كل شىء ولية وقت تعرف بعدين ولادلوقت
لازم يكون فية رغبة واستعداد للمعرفة
قولت اية دلوقت
--------------------------
البنات عالم مجنون خوف وجنون
مش اى حد يفهمة مهما قرب من سكتة
شوق وحيرة نار وظنون
---------------------------
عريس لسة جديد عايز يطلع معاش.
حاس انة لسة ماشاف حياتة ولافيها عاش
تقولة اية ياعم
اقولك عبدالفتاح لسة ماجاش

الخميس، أكتوبر 18، 2007

سر العلاقة بين البنات والمراية


علاقة البنات مع المراية علاقة قديمة علاقة حب وعشق لاتنتهى حتة بعد كسرها او فقدها يتم استنساخ اخرى عن طريق الشراء لااخرى بنفس المواصفات التى كانت موجودة فى المراية القديمة
---------------------------
لاتستطيع بنت ان تعيش بدون مراية ولو لثانية واحدة فهى بالنسبة لها الرفيقة والصديقة والعزيزة على قلبها واللى تنسى الدنيا كلها ولاتنساها او تبعد عنها حالة من حالات العشق والمحبة الفريدة فى نوعها ولا تجد لها مثيل فى اى وقت علاقة اتشرف بترشيحها للدخول الى الموسوعة العالمية
---------------------------
ان المراية بالنسبة الى البنات روح وحياة طريق لاغنى عنة مهما مرت الايام والشهور والسنين على البنات احتمال ان تفقد اى علاقة بريقها الا علاقة البنات مع المراية فهى كل ثانية فى تجدد مستمر عاطفة لاتنتهى الا بالموت انى اتخيل واعتقد ان البنات عند الموت تنظر النظرة الاخيرة الى المراية لقاء النهاية والوداع
---------------------------
من شدة حب البنات للمراية تجدها معها فى كل مكان فى الجامعة والعمل والنادى وفى الطريق فى اى مكان لاغنى ولا استغناء عنها الم تصادف فى مرة بنت وهى تمسك بالمراية وهات ياحب وعشق وهيام تنظر فيها وتنسى العالم والدنيا
----------------------------
ان حب البنات للمراية نابع من حب الظهور فى احسن حالة فالمثل يقول لبس البوصة تبقى عروسة_ طيب وهتبقى عروسة ازى بدون مراية لازم وجودها عشان تعرف تظبط وتحدد وتلون وفى النهاية عندما تنظر اليها تشعر انك تنظر الى عروسة بلا روح
----------------------------
لامانع من ان تحب البنات الظهور بمظهر حسن وجميل ولكن دون تكلف فخير الامور الوسط ولكن هذا التعلق الشديد بالمراية هل هو حب وعشق ام تعود وادمان ام هو اشياء اخرى لانعرف نحن الرجال عنها شىء؟
-----------------------------

الاثنين، أكتوبر 15، 2007

ياحمار حقك علينا ليك حق والحق علينا


الحمار حمار وهيفضل طول عمرة حمار لاهيتغير ولا هيكون حاجة ابدا غير انة حمار بياكل ويشرب وبيشتغل احلى شغل بجهد وعرق ويبذل مجهود اتحدى انسان يعمل مجهود زى اللى بيعملة الحمار
--------------------
الحمار رغم التعب وعدم التفدير من الانسان لية والاهانة اللى بيوجها لية من ضرب وشتيمة كل يوم رغم انة شايف شغلة لكن حكم القوى رغم كدة عمرة ما بكى ولا اشتكى ولا طلب فى يوم بحقوق المفروض تكون لية
فى انسان يقدر يشتغل كل يوم وفى عز النوم تصحية عشان يشتغل رغم انة من عشرة دقائق كان شغال من غير ما يعترض ولا فية حكم علية يشتغل بدون نفس ولا يطلع انتاج بعكس الحمار اللى ما تفرق معاة حمار صحيح بتاع شغل

---------------------
قولة ان الحمار مش بيفهم دى كلمة ومقولة مش فى محلها يعنى لو كل يوم وخد الحمار ورايح بية مكان ومرة غبت علية فى المعاد المحدد يروح على البيت زى الشاطر فاهم وعارف وبيقدر يروح وحدة يبقى اللى يقول انت مش بتفهم زى الحمار اوعى تزعل لانها مش شتيمة بالعكش مدح وحد يطول يبقى حمار اليومين دول
-----------------------
الحمار ابو الصعب كلة شايل هم الانسان كلة ولا حد فى يوم من البشر شال همة ولا شاف دمعة فى عنية وفكر يعرف مالة فى ايةمش مهما كان الحمار دة روح وكل روح ليها احساس ومشاعر وصدقينى الحمار بيصعب علية نفسة بس مش بيعرف يعبر زى الانسان
------------------------
دة انت لو ماشى وحد خبط فيك بدون قصد بيكون يوم ما يعلم بية الا ربنا وممكن تتخانق معاة وتشتم مع انها حاجة لاتستهل ومش مقصودة اما الحمار ينضرب ويتهان كل يوم وصابر وراضى مش ضعف لكن معرفة داخلية جواة ورسالة واضحة بيشوفها قدامة ان دة قدرة ولا هروب منة فعشان كدة صابر
-------------------------
الحمار ابتدى البعض يعرف قمتة فية اللى غنى لية وفية اللى كتب عشانة وفية اللى ابتدى يهتم بية وعلى قد ما يشتغل فية راحة ورعاية لية ماهو بالعقل شايل حمل لازم يكون فية تقدير مننا ونخد بالنا منة مهما كان روح زى ما قولت وكل روح بتحس
--------------------------

الثلاثاء، أكتوبر 09، 2007

ايام زمان بتاعت مين فينا


دلوقتى كل واحد مخنوق مضايق بيمر بظروف صعبة مهما كانت كبيرة صغيرة تتحل بسرعة او تخد وقت كبير اى حاجة بتحصل لااى حد فينا يقول فين ايام زمان
-----------------------
اى حاجة معروضة فى سوبر ماركت او بوتيك او محل عصير قصب او اى اكل وشرب موجود مش عجبنا حتة الفلوس كترت ولا قلت فى ايدينا ما بقاش فيها بركة فين ايام زمان
-----------------------
الاهالى ديما يقولوا وهما فى حديث مع الابناء فين ايام زمان هو كان فية كدة ولا كدة ولا كان فية اللى بحصل وبنشوفة دة
ويكتر الكلام على جميع النواحى الكل عايز ايام زمان ترجع والعجيب انى كنت بشوف فى افلام قديمة انتاج الاربعنيات والخمسينات الاباء تقول وهيا توجه كلامها الى الابناء انتم جيل ما يعلم بية الا ربنا فين ايام زمان
------------------------
يعنى الموضوع وراثة وتعود استلام وتسليم من جيل الى الاخر كلام يتقال وجمل توضع فى وسط اى موضوع لمجرد توضيح ان زمان بتاعهم احلى مليون الف مرة من دلوقتى
------------------------
يعنى ايام زمان بقت شماعة جاهزة لكل الاجيال يتم تعليق عليها جميع الاخطاء والمشاكل التى تحدث فى الحياة زى ما يكون ايام زمان دى ما كان فيها مشاكل ولا فقر وتعب والناس كلها كانت مستريحة ومحدش تعبان
وبكرة نكبر احنا كمان ونقول للعيال انتم جيل ما يعلم بية الا ربنا فين ايام زمان صحيح دنيا وناس العجائب

السبت، أكتوبر 06، 2007

ساعة رضاعة وانا عايز ساعة رعاية

فى موضوع محيرنى اوى وشغل بالى ايام وليالى ومش بعرف انام منة وقولت مفيش غير انى اتكلم واحكى علية يمكن ارتاح والحمل يخف من عليا
-----------------------

دلوقتى منتشرة اوى حكاية المساواة بين الرجل والست وعايزنها مساواة فى كافة المجالات وكل حاجة الرجل بيحصل عليها تحصل الست عليها لان كل منهما انسان والحقوق واحدة انا بما انى رجل موافق جدااا ان الست تحصل على ما يحصل الرجل ولكن مع شيل جميع الخطوط الحمراء ومفيش بقى عيب ومش يصح
-----------------------

بمعنى الست دلوقتى تقول انها مظلومة ومش وخدة حقها مع انى شايف انها حصلت علية ثالت ومتلت من اول حق الخلع اللى يقابلة من الرجل حق الطلاق جميل اوى طيب بقى فية حاجات دلوقتى حصلت عليها الست ولم يحصل عليها الرجل وكما فية حاجات مايصحش على الست القرب منها ومسموح للرجل بس فين المساواة ما هو اما مساواة على طول الخط او بقى الرجل رجل والست ست
-----------------------
رغم ان الستات عايزين هما المساواة مع الرجل الاانهم اول من تعدى على هذى المساواة واصبح للستات الان اشياء مخصصة لهم دون الرجال يعنى اتفاقية المساواة باظت على ايد من طالب بيها
-----------------------
عندك الان عربيات مخصصة للستات عشان راحتهم سواء نقل عام او مترو الانفاق- طيب هو فية للرجالة عربيات كدة مخصصة؟ طبعا لا عشان دول الرجالة- دى اول حاجة من طرف الست لهدم اتفاق المساواة
---------------------
بعد كدة لو حضرتك شغال تيجى الست قبل معاد الشغل بساعة وتمشى اللى بيسموها ساعة رضاعة جميل- طيب هو الرجل الزوج مش عايز ساعة رعاية ولا هيا على راسها ريشة فين المساواة
-----------------------
عندك كمان لو الشغل ظروفة محتاجة انك تسهر او تبات دة مسموح للرجالة بس لكن الستات عيب يصح وحدة تبات فى الشغل وسط الرجالة فين المساواة
-----------------------
يعنى باالبلدى ياحضرات الستات عايزين مساواة ناقصة فيها مصلحة ليهم وبس مدام فية فرق كدة وعيب ومايصحش يبقى فية فرق بينا وبين الستات يبقى مفيش حاجة اسمها مساواة على طول الخط وباعتراف الستات نفسهم ان فية حاجات للرجالة صعب عليهم الدخول فيها يعنى فية فرق واعتراف صحيح من الستات بكدة
----------------------
ومن هنا اعلن ان بنود الاتفاقية الخاصة بالمساواة بين الرجل والست غير كاملة ويوجد بها بعض الثغرات التى ليست فى صالح الرجل
1- يجب ان تخصص فى وسائل المواصلات المختلفة عربيات فقط تكون للرجالة او الغاء العربيات المخصصة للستات
2- نطالب بساعة رعاية مثل ساعة رضاعة لستات ومفيش حد احسن من حد
3- نطالب بسهر وجود الست بعد مواعيد العمل الرسمية مع السماح لها بالمبيت اذا تتطلب العمل هذا مثل الرجال
4- عند اجازة الوضع للست يجب اعطاء الرجل مثلها حتة يرعى الست والوليد المنتظر يعنى هيا ترضع واناا خد بالى منهم
وعلى كل رجل يجد بعد النقط التى موجودة لصالح الست وغير موجودة للرجل كتابة هذى النقط فى الرد حتى نجمع اكبر قدر من المطالب التى هدمتها الستات فى اتفاق المساواة