مرحبا بكل الزائرين

مدونتى مدونة عامة الكتابة فيها لاتلتزم بأى قواعد ادبية فهى كتابة بسيطة من القلب الى القلب من دماغى وبقلمى الخشب ت-01225069316

اصدقاء المدونة

الجمعة، مايو 30، 2008

اول تاج واخر تاج



داخل على تلت سنين تدوين عمرى ما فكرت اعمل تاج لحد ولا اقبل تاج من حد وديما كنت بعتذر بس كنت بحس بزعل ناس منى بس اعمل اية حكاية ان الواحد يكتب عن نفسة بطريق مباشر صعبة وعلى كل شىء كان لازم اقبل التلت تاجات اللى جم ليا تجربة ومش هتحصل تانى واللى اخش المدونة بتاعتة واجد مررر ليا تاج هجيبة من رجلية واعلقة على باب المدونة عندى من غير مية ولا شرب فاهمين ههههههه ومعلشى بقى مش بعرف اكتب عن نفسى وزى ما تيجى واعتبرونى نايم وبهلوس
اول تاج من اختى العزيزة سالى صاحبة مدونة حاجات جوايا وتانى تاج من اختى العزيزة كلمة حق صاحبة مدونة كلمة حق وتالت تاج من اختى العزيزة
مررت ليا نفس التاجSalwaوالاخت العزيزة صاحبة مدونة
Emaصاحبة مدونة يوميات ام البنين وهو نفس التاج الاول
------------------------------------

أذكر خمس أحلام على الأقل تخص ماضيك وتحلم فيها بتغير الأشياء ..ماذا ستعدل ..وماذا ستترك ؟ا
انا ديما بحلم عمر فى يوم مابطلت احلام عامل زى اللى عايش فى مدينة خاصة بالاحلام وفى اللى تحققت وفى اللى لسة وفى اللى تنضاف الى مدينة الاحلام وفى اللى كبرت دماغى عنها بس دة لايمنع انها عايشة جواياكنت وانا صغير نفسى اطلع ممثل او لاعب كورة او كاتب او معد برنامج اطفال مش عارف لية طفل واحلامة حد شريكة وتمر الايام وتنضاف احلام لما كبرت شويا وجدت نفسى بميل الى ان اكون ضابط او امين شرطة ودى بقى جت ليا من اغنية سعاد حسنى ماتقولشى امين شرطة ولاجراح بريطانى وتمر الايام واجد مواهب جوايا بتاكل فيا مش عارف دى حاجة بتطلع لوحدها زى درس العقل او اول سنة عند الطفل وتمر الايام واجد احلام عاملة تنضاف لما المدينة قربت مش يبقى فيها مكان وكل الاحلام دى حصلت عليها وسعيد بيها بس بطريق غير مباشر ودة كان كفاية عليا وسعيد بية
-----------------------------------

2.اذكر 5أحلام على الأقل تخص مستقبلك

كاتب اغانى على قد الحال بس يجى منى عرفت ناس فى المجال لحد ما وقعت فى واحد فرحان بيا وبقينا اصدقاء لكن لسة مستنى انة يساعدنى ويقدمنى وبقللى سنة مستنى ولسة هستنى بس مش هنسى حلمى عشان جوايا عايش
نفسى اجوز ويكون ليا بيت واسرة وعيال بس لسة صاحبة النصيب ما جت ولاشوفتها لو انى بحبها

نفسى ينزل ليا كتاب اجمع فى احلامى وافكارى وكل شىء جوايا عايز كل الناس تشوفة وتحس بية زى ما انا حاسس بية ابوى التانى صحفى محترم قال ليا انت مستنيك مستقبل كبير وادينى مستنى كل حاجة تيجى ليا اركنها واخبيها لحد ما تيجى اختها انا بكتب اللى حاسس بية بدون ما اربط نفسة بأى قواعد ادبية لانى اساسا مدون مش نجيب محفوظ ولا نزار قبانى
كفاية احلام لااحسن هعيط ههه
-----------------------------------------

3.اذكر شخصين على الأقل متواجدين في حياتك حالياً كنت تود وجودهم قبل الآن بزمن
مفيش شخصين بالمعنى المعروف بجد حاليا التدوين والمدونين ناس غالية عليا وبجد لو التدوين دة من 20 سنة كان كان الحال دلوقتى احلى وافضل كتير
----------------------------------------

4.اذكر شخصين على الأقل غير متواجدين في حياتك حاليا كنت تود وجودهم الآن أو في حياة أولادك مستقبلاً

جدى وجدتى الله يرحمهم دول بجد كان ليهم فضل عليا وتأثير كبير واتعلقت بيهم بدرجة كبيرة ويوم وفاة جدتى ثم جدى كنت حاسس ان روحى بتخرج منى لانى اتولدت خارج مصر ولما بقى عندى حوالى 4 سنين نزلت مصر وفضلت عايش مع جدى وجدتى فترة كبيرة ودة خلنى مرتبط بيهم بطريقة كلام الدنيا كلة ما يوصف اللى عايز اقولة ربنا يرحمهم يارب
--------------------------------------

نيجى بقى للتاج التانى بتاعة اختى العزيزة كلمة حق

أذكر 10 اشياء عن شخصيتك ؟؟

انسان طيب جد وصاحب صاحبة وعايش فى حالى

انسان رومانسى عايش فى حياة خاصة ودنيا تانية بتعامل مع الناس كلها بكل حب

فى بعض المواقف ممكن اتعصب بس مفيش سوانى واكون بعتذر لاانسان اللى اتعصبت علية

انسان يتوقع الخير فى اى انسان اعرفة مع الحرص فى التعامل خصوصا فى بداية التعارف لان محدش يعرف حد اوى الا لما يعاشرة ويكلم معاة كتير
انسان عاشق للفن والموسيقى والكتابة وبحب اوى الافلام الرومانسية والرعب وخصوصا الافلام الهندية بموت فيها لانها تجميع بين الاكشن والحب والكوميدياوالاستعراض غير ان الحوار فيها بيكون لية قيمة وهدف

انسان ممكن ازعل من موقف من حدث من اسلوب شخص لكن لااحمل ضغينة جوايا لااى حد

انسان بيحب الخير والسعادة للناس كلها واحزن لما بشوف الحزن والتعاسة فى عيون البعض
-------------------------------

تحياتى للجميع

الاثنين، مايو 26، 2008

حكاية عريس وعروسة




لما البنت ..... تتقدم لعريس
والشاب قاعد ..... فى بيتة
مستنى الرزق والخاطبة ...... تجيب لية عروسة
-------------------
ويتعرض على البنت .... كدة كم صورة شاب
تختار منهم اللى تحس بية.... ويحن ويرق لية القلب
وتروح على بيتة .... وتخد ابوها وامها
عشان تتقدم وتخطب ..... الحلو الامور
وبالمرة تتأكد الاصل ..... كدة زى الصورة
وان الصورة ..... ما بتكدبشى
-----------------------------
وماما بتاعة ..... العريس مسكتة
وعلى غرفتة ..... تجهز فية وتنصحة
ان كل كلمة بحساب ..... ومايتكلمش
الا لما تبص لية ...... بصة بعنيها
متفق عليها بينة ..... وبينها
---------------------------------------

وتيجى العروسة واهلها .... عشان تشوف العريس
اللى كان قاعد وهادى .... وكلة خجل
وفى دماغة كلام ..... ماما لية
وكان طول الوقت مبتسم .... على بسيط
وفى نفس الوقت وشة ما طلعشى .... من الارض فى اربع ساعات
غير مرة او مرتين خجل .... وكسوف بقى
------------------------------------------------------
والعروسة اللى هيا امورة نازلة اسئلة .... للعريس الامور
وهو يبص عند ماما الاول .... يخد الامر العيونى
وبعدين يجاوب يادوبك ..... على قد السؤال وكان
بيقطع فى الاجابة زى عربية ......على وشك تخليص البنزين
------------------------------------------------------

واصعب سؤال كان للعريس ..... لما العروسة قالت لية
انتى ياامور بتشرب سجاير ..... اوعى احسن ازعل
قال ليها وبكل خجل .... لا طبعا مش احبها
انا احب التوفى .... والايس كريم
قالت العروسة .... ياسلام عليك امور
انا صحيح بشرب.... بس خفيف خفيف
بس مش كل نفس على ..... الصدر عشان صحتى
وعريس المستقبل الامور..... عشان مش اتعبة معايا
واتعب صحتة وقلبة ..... الرقة الحنون
--------------------------------------------------------

ام العريس تقول ونعمة ..... الاخلاق ياعروسة
انا بطلتها من رابعة ..... ابتدائى على طول
وانتى على راحتك يا امورة ..... لو مش قادرة تبطليها عادى
ولايهمك الامور مش يقدر ..... يكلم ..... هو فى كلمة بعد عروستة
تبص العروسة للعريس الامور ..... يهز رقبتة بالموافقة
ويرجع تانى ......عيونة على الارض
----------------------------------------------------------------
وكانت كارثة ومصيبة وحكاية ..... لما خرج الامور مع عروستة
فى البلكونة قاعدة على انفراد عشان ..... كل طرف يفهم التانى بسرعة
وفى وسط الكلام والحديث ...... مسكت العروسة ايد الامور
وقربت منة تقول ...... لية كلمتين حلوين
قام الامور وقال ليها ..... عيب عليكى ياوحشة
وجرى على ...... ماما بيعيط
----------------------------------------------------------------

خدتة ماما فى حضنها......
فية مالك ياحبيبى فى اية
اية يا امورة مالة ابنى......... انتى عملتى فية اية
تقول امورة لاام امور ابدا.......... وحياتك ياماما كل الحكاية انى بكلمة
وكل ما اكلمة القئية مكسوف........ وشة على طول فى الارض
قولت اخرجة من المود دة قربت منة...... ومسكت ايدة ولسة يادوبك
بقول كلمتين حلوين حصل اللى حصل دة......... وانا ونبى ما اقصد حاجة
انا معاكى فى كلامك ياامورة بس كان لازم........ تعرفى وضع اى عريس
فى لحظة صعبة زى دى وخصوصا ابنى امور........ حساس وبيغرق فى شبر مية
على العموم انا اسفة ياماما مش هيحصل تانى...... وتبص لاامور اللى كان حاضن مامتة .....من وقتها
وتعتذر لية ويبص ليها بكسوف........ نظرة قبول الاعتذار
-----------------------------------------------------------------------------
وتمشى امورة واهلها بعد ما شافت العريس امور....... ومامت امورة بعد وصولهم الى بيتهم
قالت اية رايك ياامورة فى امور....... هو باين علية دلوع بس مؤدب وبيسمع الكلام
تقول امورة اة هو صحيح كمان ...........عايز تعديل فى حبة حاجات...... بس دى عليا انا
انا هخلية حرج كدة ويعرف يكلم...... مش كل ما اكلمة يبص....... عند مامتة الاول يخد التمام
ترد امهما براحتك امورة بس ارد على ام امور امتة.... تبص امورة ليها وتقولها عدى يوم ولا اثنين
لازم مامتة تتصل بيكى دة هيكون دليل على الموافقة......... ساعتها نروح ونحدد كل حاجة
---------------------------------------------------------------

تتدخل ام امور علية فى غرفتة وكان قاعد على السرير ....... وسرحان على الاخر
حتى ما حسش بمامتة لما دخلت علية........ اللى قعدت تبص لية ثوانى وتضحك
اية يامور سرحان فى امورة ولا اية .... ماما لا ابدا امورة اية اللى اسرح فيها
تبص لية ماما وتقول لية على ماما بقى ........ ياحبيب ماما طيب هات عينك فى عنيا
وتقرب منة يكسف ويقول الله ياماما وبعدين معاكى .........اة عجبنى بس اللى عملتة معايا واحنا مع بعض وحدنا....... خوفنى منها اوى باين عليها شقية خالص........ وتعرف شباب قبلى كتير
انا لازم اعمل ليها اختبارات لااحسن انا.......... مش احب اتربط بنت تعرف قبلى شباب
يعنى لو امها اتصلت اقول اية ......... ابقى قوللى امور موافق وحددى معاهم ميعاد عشان
نتفق على كل حاجة............. تبص لية وتقول اة من دلع الشباب
---------------------------------------------------------------

السبت، مايو 24، 2008

كلام خاص ومدونات مصرية للجيب




توقيع اول عدد من مدونات مصرية للجيب شىء جميل والاجمل ان فريق العمل كلة بالكامل من المدونين من اسرتنا الجميلة انا مش اقول واتكلم عن بعض الحاجات اللى مش عجبتنى لما روحت لان فى ناس كتير كتبت عنها انا هقول بس كلمتين من لحظة دخولى وحضورى الى انصرافى اجمل لحظة بجد لما تشوف وتقابل ناس غالين عليك اول مرة تشوفهم وكان جميل انى قابلت ناس حلوين من اللى اعرفهم
------------------------------------
اول ما وصلت وطلعت المكتبة وجدت زحمة وناس كتير كنت مبسوط بالمنظر وحزين لانى ماشى على عجاز نظرا لعملى عملية فى رجلى من حادثة عربية من ست شهور ولسة انا فى فترة ومرحلة العلاج الطبيعى . كنت واقف ومش عارف اعمل اية ورجلى وجعتنى من كتر الوقفة الى ان وجدت من احضر كرسى ليا لااجلس دون سابق معرفة وعرفنى بنفسة كان رامز عباس انسان عسل بجد وجدع يعنى جاب ليا الكرسى وكنت عطشان جاب ليا مية بجد هون عليا وحدتى وانا بين عجازى اللى مانعنى اقوم واتعرف على الناس شكرا يارامز انت انسان محترم وسعيد بمعرفتك
---------------------------------------

وانا فضلت قاعد على الكرسى ومش قادر اقوم غصب عنى رجل مريض اعمل اية وانا قاعد كان ناس رايحة وجاية عليا وبعدين وقف قدامى احمد مهنى وقال ليا تامر نبيل قولت ايوة وعرفنى بنفسة وكنت مبسوط انى وجدت حد اتكلم معايا وعرفنى ولو من الصورة اللى على المدونة وبعد السلام وانصراف احمد وجدت مين اختى العزيزة انجى صاحبة مدونة اى حاجة بقى طبعا اعرفها وهيا تعرفنى من سابق لقاء للمدونين كان فى الاوبر سلمت عليا وسلمت عليها وكنت فرحان انى اخيرا وجدت انسان اعرفة ومش اى انسان دى اختى العزيزة انجى
---------------------------------------
بعد كدة وجدت اللى خبط فى رجلى كنت لسة هشيل الكرسى واخبطة بية هههههه وجدتة ابرهيم صاحب مدونة ابرهيم معايا وسلمت علية وسلم عليا وطبعا اعرفة ايضا من لقاء الاوبرا وبعد كدة سلمت عليا وينكى وسلمت عليها ودى بقى اخت عزيزة وبنت عسل وجدعة جدعة بمعنى الكلمة واكتر كمان وقالت ليا هتيجى الحفلة كان عندها حفلة وهتغنى فيها صوتها جميل وكان نفسى اروح اسمعها بس انا بقدم ليها اسفى لانى بجد مش هقدر فى حالتى دى اروح مشوارين وراء بعض وان شاء الله وينكى اول ما اخف كل حفلة هتشوفينى فيها لحد ما تزهقى منى هههه
-----------------------------------------

بعد كدة جت مدام ايناس وسلمت عليا وعرفتنى من العجاز والصورة سوابق انا هههه وعرفتنى بنفسها وسلمت عليا وبعد الكلام والسلام طلبت منها تندهة ليا احمد القاضى صاحب مدونة يامراكبى عشان اسلم علية لانةكان جوة فى الزحمة وانا صعب اوصل لية وكتر الف خيرها ندت لية وسلمت علية وسلم عليا والله بجد حسيت انى اعرفة من سنين انسان بجد محترم وكان نفسى اجلس اكلم معة اكتر بس ان شاء الله تيجى فرصة تانى واكون افضل من كدة
-----------------------------------------.
وجانى وسلم عليا اخى العزيز ادهم صاحب مدونة فى عمق الحياة وطبعا فى سابق معرفة وانبسطت انى شوفتة بجد بعد كدة سلمت عليا ولاء صاحبة مدونة والقادم اجمل وسلمت عليها وسلم عليا ايضا شيماء الجيزى صاحبة مدونة صحافية مع ايقاف التنفيذ وانا كنت ماشى وقفنى عم ابو خالد وسالنى انت مدون قولت لية اسمى والمدونة وعرفنى من خلال الصورة وفرصة سعيدة بجد انى قابلتة بجد لانة رجل عظيم . وبعد كدة فى مدونين كتير عرفونى بنفسهم وعرفونى من خلال صورتى او العجاز اللى بقيت مشهور بية بس لااسف مش فاكر حد لان الكلام كان وانا ماشى وياريت يسامحونى
----------------------------------------------

وانا بجد بتاسف لااى اخ واخت اتكلمت وياهم ونسيت اكتب عنهم او اى حد كان كلمنى ومش عرفت اتكلم معاة كويس معلشى ياجماعة وبتاسف ليكم انا نفسيتى تعبانة من ساعة الحادثة والوقت اللى طول عليا فى البيت ست شهور ولسة ماشى فى العلاج واتمنى مش حد يزعل منى وان شاء الله المرة الجاية اكون خفيت وسبت العجاز اللى انا مخنوق منة الدعاء ليا احلى ناس وربنا يخليكم يارب ومتجمعين ديما على
الخير والحب

الأحد، مايو 18، 2008

عالم التدوين- عالم حر لكل انسان حر



يانهار بنى أسود ابيض مش لية الوان اية اللى انا شوفتة وسمعتة دة اية اللى انا قريتة دة معنى اية الكلام دة يعنى انا وكل الناس بيضحك علينا من مدة كبيرةواحنا ولا عارفين وماشين فى الطريق راضين وسكتين ونقول بكرة تتعدل والحال هيبقى مية مية واشطة
ومهلبية
---------------------------------
يامعلم يامعلم شوف يامعلم احنا اضحك علينا يامعلم انا وانت وكل الناس اضحك عليهم يامعلم. اية يامنيل على عنيك الكلام اللى بتقولة دة مين اللى يقدر يضحك على المعلم هو انا زيك ولااية طيب امشى من قدامى لااعمل راسك نجفة واعلقها فى المحل حتى مش هينفع هيكون فال مش حلو عليا ومش بعيد تجيب النحس هيا اى راس دة راس الطور ياطور قال اضحك عليانهههههه امشى ياض من قدامى وروح هات واحد شاى
-----------------------------------
احلى واحد شاى لااحلى معلم بس لو سمحت يامعلم ممكن تسمعنى سبنى بس اقول اللى عندى يعنى عادى اهبل وبيهبل واعتبر انك بتسمع اى كلام من عبيط ماشى فى الشارع. الله ما طولك ياروح على هذا المجروح ياابنى انت شارب اية النهاردة مية لفت ولامبلبع اية فى يومك اللى مش هيعدى دة. طيب يامعلم ادينى فرصة اشرح بس. تشرح قول ياخيبة اشوفك متشرح على باب الحارة
-----------------------------------
كل حاجة نزلة نار كل حاجة مفيش يوم الا وتغلى والاسعار بقت نار حتى الناس بقت تغنى بدل نار ياحبيى نار بقت تقول نار يااسعار نار يعنى شوف انت يامعلم من يومين بس غليت كل الطلبات لية بقى عشان طبعا الحاجة غليت وبتشريها غالية يعنى لازم تغلى انت كمان عشان تعوض فرق السعر والحال كدة ماشى على كل حاجة . واية الجديد ياسابق عصرك؟
------------------------------------
الجديد فى الجرايد اللى كل يوم تكتب وتقول نزول الاسعار الحفاظ على محدود الدخل واحلى الكلام اشوفة واسمعة فى الجرايد والمجلات والوسائل الاعلانية لكن على ارض الواقع كل حاجة مختلفة يعنى بيضحك علينا يامعلم وفى الاخر بعد ما الناس فتحت مدونات عشان تعبر فيها عن رايها قال اية طلع عليهم بتوع الجرايد واتتقال عليهم كلام وحش خالص وشتيمة و كلام لايدل على ثقافة ولاعلم ولا اسلوب كويس فى مخاطبة الاخرين قمال الجريد دى مصدعة الدماغ بالحرية فين دى بقى
---------------------------------
وبعدين بتوع التدوين ناس بتعبر عن رايها بكل حرية ممكن نختلف معاهم بس مش يكون بالرد والكلام اللى اكتب عليهم دة دة دليل على سقوط بعض الجرايد والمجلات والغيرة من المدونين الغلابة وعمالة تحسد فيهم . خلاص اسمع ياواد احنا نعمل مدونة ونكتب فيها راينا اسال حد تتعمل ازى.؟ انا اعرف يامعلم . وانت عرفت منين يامنيل. اصل انا من المدونين يامعلم

الخميس، مايو 15، 2008

بدون فلوس - كيف تكون رجل اعمال ؟




شوف لو كنت وحيد يعنى لوحدك وبتاعنى من الوحدة ونارها وطول ايامها ولياليها وحاسس انك على طول مخنوق وقرفان وعايز تتجوز ولسة بتجهز نفسك او لسة بتفكر ازى هجهز نفسك مش مشكلة ومش تخاف ابدا خليك جرىء وبدل قاعدتك فى غرفتك لوحدك بين كتب وكمبيوتر وصور ومفيش ولاصوت جنبك وحاجة تعمل حس بس يبقى
انت مفيش قدامك غير حل واحد ممكن كمان تبقى عن طريقة رجل اعمال
----------------------------------

تدور على اللى يعمل جنبك صوت وحس ويشيل من دامغك الحيرة والاحساس بالوحدة القاتلة شوف كلب او قطة ولو مش عندك مكان يساع كلب خليك فى مشوار القطة مشوار سهل وبسيط ومش بتخد مكان كبير مش مهم بقى تتصرف على اكلها لو بخيل او مش بتحب تصرف ابقى حط ليها بواقى من عندك اللى تفضل بس خلى عندك زمة وضمير
----------------------------------
صحيح انت لاهتعرف تتكلم ولاهتعرف تحكى ليها همومك وجراحك وتعب ايامك وسهر لياليك كفاية عليك تشوف اللى قاعدة جنبك وتلعب فى رجلك وانت قاعد واللى كل شوى نونو ياسلام اة لو تعرف معنى كلمة نونو ولاشعورك واحساسك لما تسمعها حاجة تجنن وتخرجك من شعور الكبت والوحدة اللى انت فية
----------------------------------

وكمان ممكن تلعب معاك ويكبر الموضوع معاك وتفضى غرفة من شقتك او لو سطوح البيت بتاعك لوحدك يبقى اتحلت تربى قطط عندك والحكاية بسيطة والبداية قطتيتن وبعد كدة تبقى قطط وكل قطة هتجيب ليك قطط وتبقى صاحب مزرعة قطط كبيرة ممكن تصدرها الى الصين زى ما عمل عمك لاسع وبقى من اغنياء العالم والناس كلها مفيش على لسانها غير حكاية عم لاسع ومشوار عم لاسع وفلوس عم لاسع
-----------------------------------

الصين دلوقتى القطط والكلاب هتخلص من عندهم وعشان كدة ابتدى غلان التجارة عندهم عنيهم تروح على الاستيراد وطبعا مش هقول ليك بيتعمل بيهم اية انت عارف انهم وعموما بشكل عام اغلبية دول اسيا تموت فى اكل القطط والكلاب والضفادع شوف بقى مشروع زى دة تكلفتة بسيطة ومكسبة مضمون وكمان ممكن تنزل اى شارع تصتاد الكلاب والقطط وتحبسهم عندك وتعمل كمية وبعدين على التصدير عدل وبعدها بقى هتبقى ياحلاوة من الاغنياء الكبار بس اوعى توزع لبتوع الكوفتة والكباب لااحسن ادعى عليك نههههه
----------------------------------

يعنى لاهتحس بوحدة ولاقرف وكل شىء هيكون ماشى معاك ومتظبط على وحدة ونص وفكر وروح طل وبص على مشروع عم لاسع وهتعرف ان المشروع ناجح ومربح منها تخلص المنطقة من الكلاب الضالة والقطط ومنها هتبقى رجل اعمال قولت اية؟.

الاثنين، مايو 12، 2008

خد الامور ببساطة وبلاش حكاية العنب




لو واحد قال ليك واحد +واحد= كم هتواجب صح ولا هتقع فى فخ وتقول دة سؤال صعب وضعنى فى وضع محرج ياخيبتى وياشماتة ابلة حكمت وهيئة المدرسين وممكن تكتئب وتصدر منك اعمال مش مفهومة ومش بعيد تنتحر
وممكن تجنن ويجى ليك حالة هيستريا وتمشى فى الشارع وتغنى وتقول اى كلام واحد اثنين سرجى مرجى وياسلام عليك وانت واقف فى وسط الشارع وتصرخ وتقول دمرونى لانى طيب النية سالونى سؤال صعبا
مفتريا
-----------------------------------------

ووبعدين الواحد لو جلس مع نفسة هيقول انا عملت كدة لية وهو السؤال صعب ولا انا ما فكرتش كويس ولا اخذتة على صدرى و على انة استهزاء بيا وبعقلى عشان كدة رد فعلى كان فية شىء من العصبية والجنون
مع ان الواحد لازم يكن هادى وعندة استعداد يستقبل اى حاجة لاننا عايشين فى دنيا والدنيا فيها وفيها يعنى مثلاا فية اللى يقول العنب العنب العنب ويقولك فن والناس هايصة ولا مش عارف لايصة بس مبسطوطة وفية ناس تقول كلام زى اهواك واتمنى لو انساك وايضا دة فن الاختلاف بس فى التوقيت
----------------------------------------

لو كان صاحب اهواك عايش وشاف صاحب العنب كانت حصلة قفلة وكان كل واحد فيهم جرى من التانى لان هحيس انة فى عالم مجنون او عندة حالة انعدام اللا اية البتاع يابتاع مش عارف لما افتكر هقول المهم كان هيبقى فية تنافر وليس تجازب
وحال الدنيا على دة الحال مرة فوق ومرة تحت مرة سهل ومرة صعب واحنا بقى لو خدنا كل حاجة بجدية اكثر من الازم ممكن نجنن ويحصل لينا زى الواد اللى سال الواد بردوا واحد + واحد= كم فتجنن لانة عقلة لم يقبل ان يستخف بية حد ولو كان خدالامر بسهولة وقال اثنين كان خلاص كل شىء اتحل
----------------------------------------

لكن باين علينا احنا اللى بنعمل من الحبة قبة وفى الاخر بنركب المراجيح وعلى اعتقاد انها هتوصلنا المريخ وياريت بقى نخد الامور ببساطة ولا عايزين تبقى زى الاخ انتم حورين والعنب العنب العنب
---------------------------------------

السبت، مايو 10، 2008

تمورة اتمسك قبل ما يروح الغابة




رايح فين ياتمورة واية الكيس الاسود اللى فى ايدك دة فى اية الكيس دة ياتمورة

يرد تمورة على ماما
ابدا يامامى دة شويت طوب على كم زلطة كدة لازوم الشغل يعنى تقدرى تقولى شىء لزوم الشىء
ترد ماما
شغل اية ياتمورة روح الله يخيبك انت اشتغلت اية بقى بياع طوب وزلط
اقعد ياواد ياتمورة مفيش خروج قبل ما اعرف منك اية حكاية الطوب والزلط دى
--------------------------------------

وفى وسط الكلام الباب خبط راحت فتحت وجدت توتة وبسبوسة وكل واحدة فيهم شايلة كيس اسود زى اللى مع تمورة
بصت ليهم كدة وقالت لا بقى الحكاية دى فيها حاجة مش مستريحة ليكم انتم نوين على اية
قولى ليا توتة رايحين على فين بالاكياس اللى فيها طوب دى قولى ياشطورة يا احلى بنوتة . ترد بسبوسة لا ياطنت انا احلى بنوتة وتوتة تقول لا انا
-------------------------------------

ترد عليهم مامت تمورة خلاص الاحلى بقى تقولى الحكاية
والاثنين مرة واحدة رايحين الغابة عشان نصطاد
تبص ليهم وتقول غابة وصيد اية دة وهيا فين يابنات الغابة دى تقول توتة تمورة هو اللى يعرفها وهيودينا ليها
ماشاء الله تمورة هو اللى يعرف الغابة فين
وتقرب من تمورة وتقول لية قول ياتمورة فين الغابة
قول مش هقول لبابا وكمان يمكن اجى معاكم وكمان اعمل ليكم سندوتشات
------------------------------------

يبص ليها تمورة وهو منشكح شوفى يامامى
احنا هنروح الغابة اللى عند عمة فصيح وهنصتاد من هناك بقى عصافير وحمام
وبلاش اكل عشان الغدى النهاردة عليا
تبص لية وتقولة وعلى اية بقى التعب ياتمورة اقعد انت واصحابك وانا اعمل ليكم حمام
-----------------------------------

اصل الطوب غلط تيجى طوبة فى راس حد يتعور يبقى حرام عليك
قال تمورة خلاص يامامى ماشى كلامك اعمل اية بس وراح وخد توتة وبسبوسة على البلكونة ومسك كل واحدة من ودنها وقال اعمل اية فيكم ياحلوين
------------------------------------

الجمعة، مايو 09، 2008

خليك ياطيب زى ما انت طيب




ليك حق تتضايق وتزعل لما تعيش فى وقت محدش بيعرف فية حد الا وقت المصالح ناس كتير دلوقتى من النوعية دى بقت منتشرة بطريقة تخلى اللى زيك ياصاحبى يخاف من الناس
لكن ياصاحبى ارجع واقول ليك ان الدنيا لسة بخير وفيها الناس الطيبة العشرية اللى وقت ما تحتاجها بتكون موجودة جنبك وقريبة منك وتساعدك على قد ما تقدر بدون هدف ولا مصلحة عايزاها منك لكن بتعمل كدة عشان دى طبيعتها
طبيعة حرة ثابتة على الخير والحب والمودة والتعامل الصادق بينها وبين احبابها اللى تعرفها حتى مع الغريب مفيش غير المعاملة الحلوة الكويسة
زيك ياصاحبى
--------------------------------------

شيل يا صاحبى الخوف من دماغك والقلق من تفكيرك وبطل تشيل جواك وتزعل نفسك عشان معاملة البعض من الناس اللى مفيش فى دماغها الا نفسها وبس وما تعرفك الا لو ليها مصلحة عندك تخدها مش تشوفها بعدها تانى الاوقت المصلحة
--------------------------------------

بتاع مصلحتة ونفسة والاخرين الى الجحيم بكرة تدور الدنيا علية ويقع على الارض وما تشيلة ولا يوقف جنبة وتواسية الا ناس اصيلة وطيبة زيك يومها يعرف قد اية هو كان انسان انانى ماحبش الا نفسة لانة مش هيشوف يومها حد من اصحابة بتوع نفس الطريق مصلحتى ونفسى كلهم وقت ما يوقع محدش هيسأل علية
----------------------------------------

خليك ياطيب زى ما انت طيب

اصيل ومن ربنا قريب

هتعيش على طول مرتاح ياطيب
---------------------------------------

الثلاثاء، مايو 06، 2008

انسانة فى صورة- شيطانة- لاتعرف الرحمة




سالى فتاة جميلة كانت فى السنة الاخيرة من الجامعة مخطوبة لشاب وسيم يدرس معاها فى نفس الجامعة نشئت بينهما علاقة حب كبيرة تحدث عنها الجميع بالجامعة
كان لسالى صديقة جميلة لكن ليس فى جمال سالى اسمها رشا وكانت الغيرة تقتلها كل ثانية عندما ترى الجميع يحاول الحديث مع سالى او ترى نظرات الاعجاب بها والغيرة بها اصبحت اكثر بعد الخطوبة
لعب الشيطان لعبتة مع رشا وقررت هدم حياة سالى مع خطيبها واصبحت تفكر فى الطريقة التى تستطيع بها الوصول الى غرضها الاسود الى ان وصلت الى الفكرة التى ستهدم بها صديقتها سالى
--------------------------------

انتهت سالى من الامتحانات وظهرت النتيجة وكانت مبسوطة بالتفوق الكبير وحصولها على أعلى الدرجات امتياز مع مرتبة الشرف مما يجعل الطريق سهل الى تعينها معيدة بالجامعة
وابتدت سالى واهلها يجهزون الى يوم الفرح بعد تحديد الميعاد مع العريس وكما فى هذا الوقت تنزل العروسة مع اهلها والاصدقاء المقربين لها لشراء كل ما هو هام وخاص للعروسة الجميلة
وفى يوم نزلت سالى للشراء وكان يرافقها رشا الشيطانة التى تجهز لهدم المعبد على رأس سالى واخرى اسمها سناء هى اقرب الى رشا من سالى ولكن لايوجد فى راسها اى ضغينة او كراهية تحملها بداخلها على سالى مثل رشا
---------------------------------

وبعد شراء الكثير من الطلبات الخاصة باالعروسة سالى وعند الذهاب الى البيت امسكت رشا بطنها وصرخت بصوت عالى من شدة الوجع الذى كان مجرد بداية للخطة
وطلبت من سالى وسناء الذهاب بها الى المنزل فهى مجرد الم بسيط ياتى لها كل حين ويروح بعد تناول الدواء الذى كتبة الدكتور لها
وهناك فى بيت الشيطانة اكملت التمثيل عليهم بعد اخذ الدواء وقالت يجب ان نحتفل اليوم بقرب زواج حبيتى سالى وقامت بتشغيل الكاسيت على اغنية راقصة ورقصت مع الغناء لسالى ثم نظرت الى سالى وقالت من الجميل ان ارى رقص حبيتى سالى لما اشوف بقى هتعرف ترقص احسن منى ولا انا اكسب
وبعد رفض سالى عشان التاخير وكثرة طلب رشا لم تستطيع ان ترفض وقامت رشاو احضرت عصير ليمون لااصدقاء وشربت سالى وسناء
---------------------------------

وقامت ترقص سالى وما هى الا لحظات حتى شعرت سالى بدوخة وجلست على السرير
كانت فى حالة توهان من مفعول المخدر الذى وضعتة لها رشا وهنا احضرت سالى مجدى صديقها الذى كان ينتظر رنة من موبيل رشا للصعود حسب الاتفاق ودخل مجدى ونام مع سالى و رشا كانت تصور اللحظات بكل دقة وكانت سالى تتحرك مع مجدى وتحاول البعاد عنة لكن المخدر كان اقوى ان تقاوم وسناء كانت تنظر ولاتسطيع ايضا فعل شىء من المخدر
---------------------------------

وعندما فاقت ظلت تصرخ وتنظر الى رشا لماذا فعلتى هذا لماذا دمرتينى انا لم افعل لكى شىءحرام عليكى يارشا
وكانت رشا تنظر لها وتضحك وتقول الان انتى فتاة ليل تخيلى عندما يرى خطيبك هذا المنظر يرى حبيتة وهى فى احضان شاب تخيلى ماذا يحدث انها النهاية سالى
وانتشر الفيلم على الموبيلات واصبحت سيرة سالى على كل لسان وصل الخبر الى خطيبها الذى كان يغمى علية من شدة وصعوبة ماراى وابتعد عن سالى
واصبحت فتاة غير مرغوب فيها من الجميع
ومهما حاولت الدفاع عن نفسها اصبحت فتاة موبيل
-----------------------------------

الأحد، مايو 04، 2008

انا وهو و حكاية البومة المسكينة




كنت جالس بمكتبى حي